“Azercell” gənc kinematoqrafçılara dəstək verir

Dekabrın 13-də "START" 3-cü beynəlxalq tələbə filmləri festivalı başlamışdır. Rəşid Behbudov adına Dövlət Mahnı Teatrında keçirilən açılış mərasimindən sonra festival "Səda" Tədris Teatrında davam etdirilir. Mədəniyyət və turizm, gənclər və idman nazirliklərinin təşkilatçılığı ilə həyata keçirilən və 3 gün davam edən bu festivalın baş sponsoru "Azercell Telecom" BM-dir.
"START" tələbə filmləri festivalı "Cinema" Gənc Kinematoqrafçılar Mərkəzi tərəfindən 2004-cü ildə təsis olunub. Bu dəfə də qalibləri 5 nominasiya üzrə müəyyənləşdirmək qərara alınıb. "Ən yaxşı film", "Ən yaxşı bədii film" və "Ən yaxşı sənədli film" nominasiyalarında qalib olacaq filmlərin müəlliflərinə pul mükafatları veriləcək. Bundan başqa, öz işləri ilə fərqlənən beş tələbənin fərqlənmə diplomu, bir tələbənin isə münsiflər heyəti tərəfindən "Ən yaxşı ideyaya görə" mükafatlandırılması nəzərdə tutulub.
Münsiflər heyətinə 5 ölkənin tanınmış kino xadimləri - Babək Şirinsifət (İran), Elçin Musaoğlu (Azərbaycan), Qaliya Eltay (Qazaxıstan), Əhməd Erdal (Türkiyə) və Əyyub Şahobdinov (Özbəkistan) daxildir.
Bu il festivala 9 ölkədən - Bolqarıstan, Özbəkistan, Türkiyə, İran, Gürcüstan, Macarıstan, Qırğızıstan, Qazaxıstan və Azərbaycandan 90 film daxil olub. Mötəbər tədbirin seçim komissiyası onların içərisindən müsabiqə proqramı üçün 45 film seçib.
Müsabiqə proqramından əlavə festival çərçivəsində münsiflər heyəti üzvlərinin də filmlərinin baxışı olacaq. Festival çərçivəsində kino peşəkarlarının mühazirələri dinləniləcək.

Respublika.-2006.-16dekabr.-S.7.