Bakıda “Start” III beynəlxalq tələbə film festivalı keçirilir

Festivalın açılışı Rəşid Behbudov adına Mahnı Teatrında oldu. Festivalın təsisçisi - “Sinema” Gənc Kinematoqrafçılar Mərkəzinin prezidenti Feyruz Şamıyev festivalı açaraq bildirdi ki, bizim məqsədimiz odur ki, kino təhsili alan gəncləri bir araya toplayıb, onların yaradıcılıqları ilə tamaşaçıları tanış edək.
Sonra qeyd etdi ki, bu festival sayca üçüncü olsa da, əvvəlkilərdən xeyli fərqlənir. Festivalın repertuarına Türkiyə, Bolqarıstan, Gürcüstan, Qırğızıstan, Macarıstan, İran tələbələrinin filmləri salınmışdır. Azərbaycanlı gənc kinematoqrafçılar 15-ə yaxın filmlə iştirak edirlər. Onlar arasında Şəhran Həsənovanın “Onlar... gələcəyimizdir” (sənədli), Kəmalə Rzayevanın “Fındıq yarpaqları” (sənədli), Elçin Musaoğlunun “Günəş və bulud” (sənədli), Könül Hüseynovanın “Sevgi əhvalatı” (bədii) və digər müəlliflərin filmləri vardır.
Kinorejissor Cəmil Quliyev tələbə filmləri festivalının əhəmiyyətindən danışdı. O qeyd etdi ki, belə beynəlxalq festivalların keçirilməsi müxtəlif ölkə gənclərinin yaradıcılıq əlaqələri qurmasında mühüm əhəmiyyətə malikdir.
Sonra ötən il festivalda qalib gəlmiş film nümayiş etdirildi. Müsabiqə proqramına daxil edilmiş filmlər dekabrın 16-dək hər gün Tədris Teatrında nümayiş etdiriləcək. Sonda qaliblər mükafatlandırılacaqdır.

Xalq qəzeti.-2006.-15 dekabr.-S.6.