Bayramov Oqtay

Konyada keçirilmiş III Beynəlxalq mistik musiqi festivalında muğam ürəkləri fəth etmişdir

Türkiyənin Konya şəhərində dahi türk filosof-şairi Mövlanə Cəlaləddin Ruminin vəfatının 733-cü ildönümü ilə əlaqədar keçirilmiş tədbirlər Azərbaycan nümayəndə heyətinin fəal iştirakı ilə yadda qalmışdır.
Tədbirlər çərçivəsində ölkəmizin İstanbuldakı baş konsulluğunun konsulu Günay Əfəndiyeva Konya bələdiyyə sədrinin müavini Osman Gürbüz, şəhərin Məram və Səlcuklu rayonlarının bələdiyyə sədrləri ilə görüşündə bütün türk dünyasının ortaq mənəvi sərvəti olan Mövlanə irsinin Azərbaycanda da qiymətli bir xəzinə kimi öyrənildiyini bildirmişdir. Vilayətin mədəniyyət və turizm idarəsinin müdiri Əbdülsəttar Yararla görüşdə isə Azərbaycan nümayəndə heyətinə xatirə hədiyyəsi təqdim olunmuşdur.
Sonra Mövlanə günləri çərçivəsində Konya mədəniyyətin təbliği dərnəyi tərəfindən təşkil olunmuş III Beynəlxalq mistik musiqi festivalında tanınmış muğam ustası Alim Qasımov, qızı Fərqanənin konserti olmuşdur. Konsertdən əvvəl çıxış edən konsul Günay Əfəndiyeva bildirmişdir ki, Azərbaycan musiqisinin incisi olan muğam bu gün Heydər Əliyev Fondunun səyləri nəticəsində bütün dünyada təbliğ olunur. Alim Qasımovun ifasında səslənən muğam festivalda iştirak edən Bosniya, İran, Özbəkistan və digər ölkələrin nümayəndələrinin, habelə konyalıların sürəkli alqışları ilə müşayiət olunmuşdur. Festivalı işıqlandıran Türkiyə mətbuatı muğamın ürəkləri fəth etdiyini yazmışlar.
Muğam ustası Alim Qasımov ölkəmizin İstanbuldakı baş konsulu Səyyad Salahlı ilə görüşmüşdür. Baş konsul festivalda fəal iştirakına və Azərbaycan musiqisini dünyada uğurla təbliğ etdiyinə görə xanəndəyə təşəkkürünü bildirmiş, ona müvəffəqiyyətlər arzulamışdır.

Azərbaycan.-2006.-21 dekabr.-S. 8.