Azərbaycanla Moldova arasında əlaqələr yüksək səviyyədədir

Dekabrın 9-da Milli Məclisin Sədri Oqtay Əsədov Moldovanın ölkəmizdəki fövqəladə və səlahiyyətli səfiri İon Robunu qəbul edib. Qonağı salamlayan spiker onu Azərbaycanda səfir kimi fəaliyyətə başlaması münasibətilə təbrik edib. Sədr Azərbaycanla Moldova arasındakı əlaqələrə toxunaraq bütün sahələrdə ikitərəfli münasibətlərin yüksək səviyyədə olduğunu bildirib.
İki ölkənin dövlət başçılarının qarşılıqlı səfərləri və bu səfərlər zamanı aparılan danışıqlar, imzalanan sənədlər əlaqələrin inkişafına təkan verib. Bu gün iki ölkə arasında siyasi, iqtisadi və digər sahələrdə əlaqələr yüksələn xətlə inkişaf edir.
Oqtay Əsədov Azərbaycanla Moldovanın beynəlxalq təşkilatlar, o cümlədən GUAM çərçivəsində səmərəli əməkdaşlığından söz açaraq bir çox məsələlərlə bağlı ölkələrimizin mövqelərinin üst-üstə düşdüyünü diqqətə çatdırıb. Sədr əlaqələrimizin inkişafında parlamentlərin də böyük rol oynadığını qeyd edib. Azərbaycan Milli Məclisində Moldova ilə parlamentlərarası əlaqələr üzrə işçi qrupunun fəaliyyət göstərdiyi qonağın diqqətinə çatdırılıb.
Spiker Oqtay Əsədov səfirə uğurlar arzulayıb, onun diplomatik fəaliyyətinin ölkələrimiz arasında əlaqələrin hərtərəfli inkişafına xidmət edəcəyinə əmin olduğunu vurğulayıb.
Səmimi qəbula görə təşəkkür edən İon Robu ölkəmizə səfir təyin olunmasından məmnun olduğunu bildirib. O, ölkəsi ilə Azərbaycan arasında əlaqələrin durmadan inkişaf etidyini deyib. Gələn il Azərbaycana Moldova nümayəndə heyətinin səfər edəcəyini deyən səfirin sözlərinə görə, keçirilən görüşlərdə iqtisadi və ticarət əlaqələrinin genişləndirilməsinə dair müzakirələr aparılacaq.
Görüşdə ölkələrimiz arasında siyasi, iqtisadi, humanitar və mədəni əlaqələrin daha da inkişafı regional münaqişələrin sülh yolu ilə həlli, beynəlxalq təşkilatlar çərçivəsində əməkdaşlığın dərinləşdirilməsi və digər qarşılıqlı maraq kəsb edən məsələlər ətrafında fikir mübadiləsi ararılıb.

Azərbaycan.-2006.-9dekabr.-S.2.