"Ələkbər Tağıyevin musiqi təhsili olmayıb"

Bəstəkarın həzin melodiyaları duyğularımıza həssas xalq ruhu, coşqun vətənpərvərlik hissi axıdır

Bu gün Azərbaycanda çoxları mahnı bəstələyir. Musiqidən xəbərdar olan da, olmayan da. Belələrini qınayanda deyirlər ki, "əşi, heç Ələkbər Tağıyevin də musiqi təhsili olmayıb". Başa düşmək istəmirlər ki, onlardan fərqli olaraq, rəhmətlik Ələkbər Tağıyev əsl mahnı bəstələyirdi. Elə bir mahnı ki, 50 il bundan əvvəl bəstələnməsinə baxmayaraq, köhnəlmir. Ələkbər Tağıyev Allahın yaratdığı gözəllikləri, təbiətdəki xalis səsləri ruhu ilə duyub, insanın ovqatına uyğunlaşdıran bəstəçi idi. Bu günün məşhur dırınaqarası bəstəçilərindən fərqli olaraq Ələkbər Tağıyevin 30-40-50 il bundan əvvəl bəstələdiyi musiqinin şən, həzin melodiyaları duyğularımıza incə, həssas xalq ruhu, coşğun vətənpərvərlik hissi axıdır. Onun mahnılarının əksəriyyətini çoxumuz xalq mahınısı kimi tanıyırıq... Ələkbər Tağıyev qədim Gəncə torpağında kasıb ailədə dünyaya göz açdı. Uşaqlıqdan musiqiyə həvəs göstərsə də, kasıbçılıq ona musiqi təhsili almağa imkan verməyib. Orta məktəbi qurtarandan sonra, məhkəmədə kərgüzarlıq etdi və işləyə-işləyə qiyabi ali hüquq təhsili aldı və gənc yaşlarından prokurorluq sistemində müxtəlif vəzifələrdə çalışdı. Lakin içindəki sənət eşqinin vulkan kimi püskürməsinin qarşısını ala bilmədi. Günlərin birində Filarmoniyada konsertdə tanınmış bir müğənninin xarici mahnıları oxumasından sonra bərk təsirlənir. Bu hadisədən bir müddət sonra, Göygöldə dincələrkən sanki ona vergi verilib. Harda olsa ucadan zümzümə etməyə başlayıb. Yaxınları elə bilər ki, onun başına hava gəlib və onu pirə apararlar. Maraqlı bir faktı da qeyd etmək lazımdır. Ələkbər Tağıyev ağır seyid nəslindən sayılır. Ulu tanrıdan bəstəçilik vergisi alan Ələkbər Tağıyev Konservatoriyanın nəzdində həvəskar bəstəkarlar üçün təşkil olunmuş ikiillik kursa daxil olur. Nəhayət, belə bir təkan baş verdi və onun həzin nəğmələri az zaman içərisində bütün Azərbaycana yayıldı. Ələkbər Tağıyevin imzası o vaxtlar bir hadisə oldu. Hamı bu imzanı sevib gözlədi, izlədi... Lakin musiqi bəstələdiyinə görə, çox təzyiqlərlə üzləşdi və axırda prokurorluq sistemindən istefa verdi. Musiqini vəzifəsindən üstün tutdu. Ələkbər Tağıyevə qarşı olan təzyiqlərin, hücumların başlıca səbəbi onun istedadı idi. Ulu tanrının vergi kimi ona bəxş etdiyi fitri istedada çoxları paxıllıq edirdilər. Çünki peşəkar bəstəkarın 3-4 günə bəstələdiyi mahnını o 2-3 dəqiqəyə bəstələyirdi. Həmin 2-3 dəqiqəyə hazır olan mahnı sonradan dillər əzbəri olurdu. Bu da əlbəttə ki, çoxlarının ürəyincə deyildi. Bir zamanlar Ələkbər Tağıyevin Azərbaycan Bəstəkarldar İttifaqına üzv olması gündəmə gələndə, o dövrün məşhur bəstəkarları buna qarşı çıxıb imkan vermədilər. İndi isə vaxtilə ona düşmənçilik edən diplomlu bəstəkarlar "əşi, o Baqramyanın bacısı qızı il evlənmişdi. Ona görə, hər yerdə ona yaşıl işıq yanırdı..." kimi sözlər deməkdən sanki həzz alırlar. Dünya heç də yaxşı insanlardan xali deyil. Rəhmətlik maestro Niyazi onu SSRİ Musiqi Fondunun üzvü seçdirir. Haşiyə":: Deyilənə görə, Qara Qarayev Azərbaycan Bəstəkarlar İttifaqının sədri olanda, mərhum Heydər Əliyevin "Bəstəkarlar İttifaqının fəxri üzvü" seçilməsi məsələsi gündəmə çıxanda, o, Ələkbər Tağıyevin Bəstəkarlar İttifaqına üzv seçilməsini təklif edibmiş. Ələkbər Tağıyevin musiqimizdə böyük xidmətlərindən biri də istedadlı müğənnilər yetişdirməyidir. Bu gün Azərbaycan ifaçılıq sənətinin öncüllərindən olan xalq artistləri Zeynəb Xanlarova, Məmmədbağır Bağırzadə, əməkdar artist Nisə Qasımova, müğənni Kəmalə Rəhimli məhz Ələkbər Tağıyevin yetişdirdiyi müğənnilərdir. Bundan başqa Azərbaycanın korifey müğənniləri Rəşid Behbudov, Şövkət Ələkbərova, Gülağa Məmmədov, Sara Qədimova və digərləri onun bəstələrinin ifaçıları oldular. Müğənnilik sənətinə üz tutan gənclər onun bəstələdiyi mahnılarla özlərini sınadılar. Təssüflər olsun ki, bu gün "müğənnilkdən uzaq" bəzi oxuyanlar Ələkbər Tağıyevin mahnılarına müraciət edirlər...

Üç nöqtə.-2006.-27 dekabr.-S13.