BakıdaRusiya MDB- dünyadaadlı fotosərgi açılmışdır

 

Azərbaycanda Rusiya İli və Rusiyada Azərbaycan İli hələ uzun müddət davam edəcəkdir, çünki xalqların və mədəniyyətlərin dostluğu tükənməzdir. Bunu Rusiyanın Azərbaycandakı səfiri Vasili İstratov dekabrın 25-də Bakıda “Rusiya MDB-də və dünyada” adlanan və Müstəqil Dövlətlər Birliyinin 15 illiyinə həsr olunmuş sərginin açılışında bildirmişdir.
Vəcihə Səmədova adına sərgi salonunda Azərbaycan Rəssamlar İttifaqının, Rusiyanın Azərbaycandakı səfirliyinin, Rusiya Beynəlxalq Elmi və Mədəni Əməkdaşlıq Mərkəzinin ölkəmizdəki nümayəndəliyinin dəstəyi və “RİA Novosti” agentliyinin Bakı filialının təşkilatçılığı ilə keçirilən sərginin açılışı mərasimində Azərbaycan Rəssamlar İttifaqının sədri Fərhad Xəlilov, Rusiya Beynəlxalq Elmi və Mədəni Əməkdaşlıq Mərkəzinin ölkəmizdəki nümayəndəsi İqor Jukov, “RİA Novosti” agentliyinin Bakı filialının rəhbəri Valeri Yenin iştirak etmişlər.
Çıxış edənlər bildirmişlər ki, MDB suveren dövlətlərin birliyidir. 15 il ərzində xalqlarımız bütün sahələrdə əməkdaşlığı genişləndirməyə səy göstərmişlər. Sərgidə “RİA Novosti” agentliyi fotomüxbirlərinin müxtəlif siyasi görüşlərdə, əlamətdar hadisələrlə bağlı keçirilən tədbirlərdə çəkdikləri fotoşəkillər nümayiş etdirilir. Ekspozisiya Sergey Quneyevin “Azərbaycan Prezidenti İlham Əliyevin Rusiya Prezidenti Vladimir Putinlə görüşü. 2006-cı il, Bakı” fotoşəkli ilə başlanır. Dmitri Koroveynikovun “Böyük Vətən müharibəsi veteranlarının görüşü. 2005-ci il, Bakı”, “Rusiyada Azərbaycan İlinin açılışı mərasimində Dövlət rəqs ansamblının çıxışı. 2003-cü il, Moskva”, Vladimir Vatkinin “Xəzərin yeni neft yataqları” fotoşəkilləri maraq doğurmuşdur. Sərgidə Rusiya Prezidenti Vladimir Putinin MDB ölkələrinin və dünyanın aparıcı dövlətlərinin başçıları, tanınmış siyasətçilərlə görüşlərini, zirvə toplantılarında iştirakını əks etdirən fotoşəkillər xüsusi yer tutur.
Sərgi dekabrın 30-dək davam edəcəkdir.

 

Xalq qəzeti.-2006.-26 dekabr.-S.3.