Rüstəm Z.

Musiqiçilərimiz Berlioz Festivalında çıxış ediblər

Fransanın görkəmli bəstəkarı Hektor Berliozun doğulduğu Qrenobl şəhərinin Kot Sant-Andre qəsəbəsində hər il bəstəkara həsr olunmuş festival keçirilir. Festivalın təşkilatçısı bəstəkarın həmyerlisi, İzer departamentinin fəxri senatoru Jan Buayenin rəhbərlik etdiyi Berlioz Festivalının Dostları təşkilatıdır. Hər il tədbirə dünyanın müxtəlif ölkələrindən məşhur musiqiçilər dəvət olunurlar. Jan Buaye bəstəkarın anadan olmasının 203-cü ildönümü münasibəti ilə keçirdiyi növbəti festivalın açılışındakı çıxışında Azərbaycan musiqiçilərinin tədbirdə iştirak etdiklərini xüsusi vurğulayaraq, respublikamız haqqında tədbir iştirakçılarını məlumatlandırıb. O, Azərbaycanın zəngin musiqi ənənələrindən, istedadlı musiqiçiləri haqqında söz açaraq, Rəşid Behbudov, Vaqif Mustafazadə və başqalarının adını qeyd edib.
Festivalda çıxış edən Azərbaycan Milli Orkestrinin gənc solistləri Anar İbrahimov (viola), Fuad İbrahimov (alt), Kira Qolubeva (piano) və Sergey Suvrov (kontrabas) iki hissədən ibarət konsertdə Hendel, Kreysler, Motsart, Ştraus və Berliozun əsərləri ilə yanaşı Azərbaycan bəstəkarları Üzeyir Hacıbəyovun, Qara Qarayevin və başqalarının musiqi parçalarını ifa ediblər. Onların çıxışını yüksək qiymətləndirən festival təşkilatçıları musiqiçilərimizə mükafat və diplomlar təqdim edib. Qeyd edək ki, tədbirin təşkilində Azərbaycan-Fransa Gənclik Assosiasiyası da yaxından iştirak etmişdir

Ayna.-2006.-21 dekabr.-S.8.