Mədəniyyət və Turizm naziri Zeynəb Xanlarovanı ad günü münasibəti ilə təbrik etmişdir

 

Dekabrın 28-də Mədəniyyət və Turizm naziri Əbülfəs Qarayev Milli Məclisin deputatı, Xalq artisti Zeynəb Xanlarovanın mənzilinə gələrək, onu ad günü və "İstiqlal" ordeninə layiq görülməsi münasibətilə təbrik etmişdir.

Əbülfəs Qarayev Zeynəb Xanlarovaya gül dəstəsi təqdim etmiş, ona rəsm əsəri bağışlamışdır. Nazir Zeynəb Xanlarovanın Azərbaycan musiqisinin inkişafında və təbliğində xidmətlərini həmçinin Milli Məclisin deputatı kimi fəaliyyətini qeyd etmiş, Prezident İlham Əliyevin 2006-ci il 26 dekabr tarixli sərəncamı ilə görkəmli müğənninin "İstiqlal" ordeninə layiq görüldüyünü və yüksək mükafatın dekabrn 28-də şəxsən ölkəmizin başçısı tərəfindən ona təqdim olunduğunu vurğulamışdır.

Z.Xanlarova ümummilli lider Heydər Əliyevin, onun siyasətini  layiqincə  davam etdirən Prezident Ilham Əiyevin mədəniyyət və incəsənət xadimlərinə göstərdikləri diqqət və qayğıdan danışmışdır. O, aldığı bütün mükafatlara, fəxri adlara görə şəxsən ulu öndər Heydər Əliyevə borclu olduğunu söyləmiş, SSRİ xalq artisti adının ona verilməsində ümummilli liderin qətiyyətli səylərini diqqətə çatdırmışdır. Sənətkar üçün ən qiymətli mükafatın xalqın istəyi olduğunu söyləyən Z.Xanlarova, bundan sonra da Azərbaycan musiqisini xarici ölkələrdə təbliğ edəcəyini bildirmişdir.

 

Xalq qəzeti.- 2006.- 29 dekabr.- S. 4.