Azərbaycan musiqi ictimaiyyətinə ağır
itki üz vermişdir. Tanınmış
müğənni, muğam
ifaçısı, Azərbaycan
Respublikasının xalq
artisti, Prezident təqaüdçüsü Baba
Mahmud oğlu Mirzəyev (Baba Mahmudoğlu) ömrünün
66-cı ilində vəfat etmişdir.
Baba Mahmudoğlu 1940-cı il noyabrın
7-də Ağstafa rayonunun Muğanlı kəndində anadan olmuşdur. 1956-1961-cı illərdə Azərbaycan
Dövlət Neft və Kimya İnstitutunda
təhsil almış,
öz ixtisası üzrə mühəndis
kimi əmək fəaliyyətinə başlamışdır.
Muğama, musiqi sənətinə
olan böyük sevgisi onu təhsil
almaq həvəsi ilə M.Əliyev adına Azərbaycan Dövlət İncəsənət
İnstitutuna gətirir.
1967-ci ildə bu instituta daxil olan Baba Mirzəyev
1969-cu ildə Azərbaycan
Dövlət Akademik Orepa və Balet
Teatrına dəvət
olunur.
2005-ci ilə kimi fasiləsiz olaraq muğam bölməsinin aparıcı solisti kimi bir çox
operalarda baş rollarda çıxış
edən xanəndə
Ü.Hacıbəyovun “Leyli
və Məcnun” operasında Məcnun, “Əsli və Kərəm”də Kərəm, M.Maqomayevin “Şah İsmayıl” operasında Şah İsmayıl, Z.Hacıbəyovun
“Aşıq Qərib”
operasında Aşıq
Qərib, C.Cahangirovun
“Xanəndənin taleyi”
operasında Mirseyid,
Ş.Axundovanın “Gəlin
qayası” əsərində
Camal rolunda çıxış edərək,
parlaq, yaddaqalan səhnə obrazları yaratmışdır.
Azərbaycan muğamlarının, xalq mahnılarının mahir ifaçısı olan müğənni uzun illər geniş konsert fəaliyyəti ilə də məşğul olmuş, məlahətli səsi, özünəməxsus
ifa tərzi ilə musiqisevərlərin
böyük məhəbbətini
qazanmışdır. O, Azərbaycan milli musiqi sənətini dünyanın onlarca ölkəsində — Türkiyə,
Nepal, Banqladeş, Hindistan, Əlcəzair, Tunis, Zambiya, Norveç, Avstriya, Belçika, Lüksemburq, Almaniya və İranda ləyaqətlə
təmsil etmişdir.
Azərbaycan milli musiqi sənətinin inkişafında xidmətlərinə
görə o, 1982-ci ildə Azərbaycan Respublikasının əməkdar
artisti, 1993-cü ildə
xalq artisti fəxri adlarına layiq görülmüş,
Azərbaycan Respublikası
Prezidentinin fəxri təqaüdçüsü olmuşdur.
Azərbaycan musiqi sənətinin tanınmış
nümayəndəsi, gözəl
insan, unudulmaz sənətkar Baba Mirzəyevin əziz xatirəsi bütün sənət dostlarının
və onu sevən insanların, qədirbilən xalqımızın
qəlbində daim yaşayacaqdır.
Azərbaycan Respublikası
Mədəniyyət və
Turizm Nazirliyi
Xalq qəzeti.-2006.-7 dekabr.-S.7.