Sevil

Baba Mahmudoğlu son mənzilə yola salındı
Sənət dostları “səhnədə xanəndə və aktyor, həyatda isə yaxşı insan itirdik” deyir

Dünən Dənizçilərin Mədəniyyət Evində muğam ifaçısı, xalq artisti Baba Mahmud oğlu Mirzəyev son mənzilə yola salındı. Qeyd edək ki, Baba Mirzəyev 67 yaşında ürək çatışmazlığından dünyasını dəyişib. Yaxınlarının dediyinə görə, sənətkar ikinci dəfə infarkt keçirərək vəfat edib.
1962-ci ildən Opera və Balet Teatrında çalışan sənətkar Məcnun, Şah İsmayıl, Koroğlu, Kərəm kimi rollarıyla tamaşaçıların sevimlisi olub. Onunla vida mərasiminə yaxınları, tanınmış sənətçilər, o cümlədən mədəniyyət naziri Əbülfəs Qarayev və nazirliyin digər əməkdaşları da qatılmışdılar.
Mədəniyyət nazirinin müavini Ədalət Əliyev son günlər mədəniyyət sahəsində baş verən itkilərin ağırlığından söz saldı: “Son günlər mədəniyyət işçilərindən birinin 40 mərasimi başa çatmamış digərinin ağır xəbərini eşidirik. Hüseynağa Atakişiyev, Hacıbaba Bağırov, Gülşən Qurbanova kimi sənətkarlarımız haqq dünyasına qovuşdular. Baba müəllim bizim xatirimizdə gözəl sənətkar olmağıyla yanaşı, həm də gözəl insan kimi qalacaq”.
Xanəndə, xalq artisti Mənsum İbrahimov mərhumun gənclərə hər zaman dəstək verməsindən söz saldı: “Mən teatra təzə gələndən Baba müəllimlə dəfələrlə tərəf müqabili olmuşam. Həmişə ondan qayğı görmüşəm. Gənclərə qarşı diqqəti vardı, qısqanclıqla yanaşmazdı.
Arif Babayev Baba Mirzəyevlə 30 ildən çox bir yerdə işləməsindən söz saldı: “Babanın özünəməxsus ifa tərzi vardı. Babayla 30 ilə yaxın bir yerdə işləmişik. Onun həm də yüksək aktyorluq qabiliyyəti vardı. Baba haqda danışmaq mənə çox çətindi. O, mənim xatirimdə öz sənətini sevən opera artisti kimi qalacaq”.
Tarzən Ramiz Quliyev sənətkar dostunu çılğın, sözü düz deyən, kövrəkqəlbli bir insan kimi xatırladı: “Biz bir-birimizin nailiyyətlərinə sevinən, yaradıcılığını izləyən dostlarıydıq. Babayla tək Azərbaycanda yox, Hindistanda, Pakistanda, Tunisdə, Əlcəzairdə, Avropanın bir çox ölkələrində konsert proqramlarında olmuşuq. İnsan daha çox yol yoldaşlığında tanınır. Bu səfərlərdə mən Babanın həmsöhbət, məlumatlı, bilikli adam olmasının şahidi olmuşdum. Dini bilgisi çoxuydu, sinədəftəriydi. Xanəndələr içərisində onun qədər şer bilən yoxuydu. Həm aşıq musiqisindən, həm də muğamlarımızdan xəbərdarıydı. Xaraktercə çılğın adamıydı, amma həm də uşaq kimi kövrək, yumşaq qəlbi vardı. Biz səhnədə bir-birimizi tamamlayırdıq. Mən onu müşayiət edəndə Baba deyirdi ki, həm bir tarzən kimi, həm də dost kimi sənin çalğınla oxuyanda coşğunlaşıram. Biz səhnədə həm aktyor, həm də xanəndəmizi, həyatda isə yaxşı bir insan itirdik”.
Müğənni Bahadır Salmanov Baba Mahmudoğlunun vida mərasiminin Dənizçilər Evində keçirilməsindən təəssüfləndiyini bildirdi: “Bəlkə də son vaxtlar sənətkarların qəfil ölümü gözlənilməz olur, ona görə yer seçimi çətinləşir. Amma Baba müəllim nüfuzlu bir sənətkar kimi buradan yox, daha mötəbər bir yerdən yola salınmalıydı. Mən onun oğlunun toyunda oxumuşam. Sadəqəlbli, gözəl insanıydı. Oğlu xarici dillər üzrə, qızı isə həkimlik ixtisasına yiyələnib. Baba müəllimin təəssüf ki, sənətinin davamçısı olmadı. O, təkrarsız ifaçıydı”.
Muğam ifaçıları Nəzakət Teymurova və Aygün Bayramova sənət dostları haqqında danışmağa çətinlik çəkdiklərini dedilər. Sənətkar Xırdalan qəbiristanlığında torpağa tapşırıldı.
Allah rəhmət eləsin.

Müsavat.- 2006.- 8 dekabr.- S. 13.