Oxumağı öyrətməzlər”

Brilliant Dadaşova bir müddət səhnədə görünməməsinin səbəblərini açıqladı

Respublikanın əməkdar artisti Brilliant Dadaşova bir ildən artıq idi ki, efirə çıxmırdı. Onun tamamilə Azərbaycan estrada səhnəsindən uzaqlaşdığı söylənilirdi. Ötən ay isə Brilliant xanım “Akademiya” layihəsində göründü. Sənətçi ilə müsahibəyə onun bir müddət səhnədən uzaqlaşmağının səbəbləriylə bağlı sualla başladıq.

- Mən səhnədən getməmişdim. Fikrimcə, oxumamağımı səhnədən getmək kimi qələmə vermək düzgün olmazdı. Sadəcə olaraq, əvvəlki mədəniyyət naziri Polad Bülbüloğlu “Vokaliz”in müəllif hüquqlarının qorunması ilə bağlı mənə dəstək vermədiyindən oxumamaq qərarı verdim. Bununla da öz etirazımı bildirmək istədim. Amma bu o demək deyil ki, mən onda səhnədən getmişdim və “Akademiya” layihəsi ilə yenidən səhnəyə qayıtdım. Mən hələ də oxumuram, yeni kompakt-diskimi buraxdıqdan sonra oxuyacam. Hələ ki “Akademiya” iştirakçılarının ifalarından zövq alıram.

- Brilliant xanım, yarışmaya niyə “Akademiya” adını vermisiz?

- “Akademiya” sözünü hərfi mənada başa düşmək düzgün deyil. Məlum olduğu kimi akademik ifa tərzi deyilən bir anlam var. Məsələn, bəzən birisi oxuyanda “necə akademik tərzdə oxuyur” deyilir. Yəni musiqi barədə məlumatlı olanlara bu ifadə tanışdır. Biz də istəyirik ki, seçdiyimiz ifaçılar akademik tərzdə oxumağa çalışsınlar. Tamaşaçılara estrada musiqisini bu cür təqdim etsinlər. Deyə bilmərəm ki, onların arasından kim bu məqsədə nail ola biləcək. Hələlik imtahan gedir. Bizim məqsədimiz odur ki, onlar bu layihə çərçivəsində akademik tərzdə oxumağı öyrənsinlər.

- Sizin fikrinizcə, “Akademiya”nın digər mahnı yarışmalarından fərqi nədədir?

- Biz insanların zövqünü oxşaya biləcək keyfiyyətli musiqi nümayiş etdirmək niyyətindəyik. Ona görə də  “Akademiya”ya ən istedadlı ifaçıları seçmişik. İnanırıq ki, onlar səsləri, ifa tərzləri, səhnə mədəniyyətləri, davranışları ilə örnək olacaqlar. Təbii ki, bu məsələdə bizim - yəni müsabiqə təşkilatçılarının üzərinə böyük yük düşür. Düzdür, onlar istedadlıdırlar, səsləri ürəyəyatımlıdır. Amma istedadı da düzgün yönəltmək lazımdır axı. Bizim məqsədimiz istedadlı gənclərə düzgün yol göstərməkdi. Əgər diqqət yetirmisinizsə, “Akademiya” müsabiqəsində iştirakçıları ruhdan, həvəsdən sala biləcək bir kəlmə də işlədilmir. Amma təbii ki, çıxışlarındakı nöqsanlar, səhvlər onlara elə canlı efirdə söylənilir. Çünki məqsədimiz onların inkişafına nail olmaq, yaradıcı axtarışlara vadar etməkdir.
Onu da deyim ki, telekanallarımıza xarici ölkələrdə yaşayan həmyerlilərimiz də baxır. Biz iştirakçılara qarşı belə münasibət sərgiləməklə demək istəyirik ki, Azərbaycanda şou-biznes təkcə qalmaqallardan ibarət deyil. Güman edirəm ki, hələ ki qarşımıza qoyduğumuz məqsədlərə nail ola bilirik.

- Müsabiqədə müxtəlif janrda oxuyan iştirakçıların seçilməsi, kvartet, duet və trionun yaradılması ideyası haradan yaranıb?

- Müxtəliflik yaratmaq istədik. Amma yenə də əsasən estrada janrında oxuyanlar üstünlük təşkil edir. Yəqin ki, növbəti “Akademiya”larda digər janrlarda oxuyanların sayı daha çox olacaq. O ki qaldı, kvartet, trio və duetlərin yaranmasına, açığı, bu əvvəlcədən planlaşdırılmamışdı. Sadəcə müsabiqənin seçim turlarına o qədər çox istedadlı gənclər gəlmişdi ki, onları necə deyərlər, ələkdən keçirə bilmədik. Həmkarlarım çox sağ olsunlar ki, üzərlərinə əlavə yük götürməyə razılıq verdilər.

- Eşitdiyimizə görə, Nicat, Xəyal və bacınız oğlu Cəmil digər layihələrdə də iştirak ediblər. Onların “Akademiya”ya seçilməsi təsadüf idi?

-  Adlarını sadaladığınız iştirakçılar seçim turlarına gəlmişdilər. Seçim turlarında iştirak edən müğənnilər və mən də onların istedadını görüb müsabiqəyə seçdik. Düzünü deyim ki, Cəmilin bacım oğlu olması səbəbindən müsabiqədə iştirakına qərar verə bilmirdim. Hətta Fidan Hacıyeva bunu mənə irad tutaraq dedi ki, o sənin bacın oğlu olduğuna görə günahkar deyil. Bu vaxt Ədalət Şükürov duet hazırlamaq yükünü üzərinə götürdü. O ki qaldı adını çəkdiyiniz digər ifaçılara, Abbas onları bəyəndi və mən də etiraz etmədim.

- Zeynəb Xanlarova musiqi yarışmalarında, o cümlədən “Akademiya”da bəzi müğənnilərin özünün müəllimə ehtiyacı olduğunu deyib. Bu barədə siz necə fikirləşirsiz?

- Bilirsiniz, musiqi məktəblərində, ali təhsil ocaqlarında çox gözəl və savadlı pedaqoqlarımız, müəllimlərimiz var ki, onlar yaxşı xanəndələr, müğənnilər yetişdiriblər. Amma onlara desən ki, qaval əlinə götür bir muğam ifa et, bunu bacarmayacaqlar. Əgər “Akademiya”da iştirakçılara müğənnilik dərsi keçmək istəsəydik, layihəyə tanınmış musiqişünasları, pedaqoqları dəvət edərdik. Tanınmış sənətçiləri layihəyə cəlb etməkdə məqsədimiz odur ki, onlar gənclərə repertuar seçməyi, səhnədə necə hərəkət etməyi, ümumiyyətlə bu sənətin incəliklərini öyrətsinlər. Ümumiyyətlə, mən bu qənaətdəyəm ki, oxumağı öyrətməzlər. Bu, Allah-təlanın verdiyi istedaddır. İnsanda səs varsa, oxuya bilir. 
O ki qaldı layihədə iştirak edən müğənnilərin özünün müəllimə ehtiyacı olmasına, Məhəmməd Peyğəmbərin yaxşı bir kəlamı var: “Beşikdən qəbir evinədək oxumaq”. Demək istəyirəm ki, bizim hər birimizin müəllimə ehtiyacı var. Hətta səhnədə 25-30 il stajı olanlar da hər gün nə isə öyrənir. Əgər biz bu gün desək ki, musiqi ilə bağlı hər şeyi bilirik və heç nə öyrənməyə ehtiyacımız yoxdur onda gərək səhnəni tərk edək.

- Bəzi müəllimlər tələbələrinə qarşı biganə münasibət göstərirlər. Buna səbəb nədir?

- Bizim layihədə bir ifaçı ilə beş-altı nəfər məşğul olur. Müəllimlərimiz arasında çox fəalları da var. Yəqin ki, bu fakt da şounu izləyənlərin diqqətindən yayınmayıb. Onlarla yanaşı mən də hər bir iştirakçının repertuarı ilə məşğul oluram. Ona görə də bəzi müəllimlərin məşqə gələ bilməməyi problem yaratmır. 

- Müəllimlərlə tələbələrin dueti təxirə salındı?

- Yox, bəzi səbəblərə görə, müəllimlər dueti bu həftə oxumağı qərarlaşdırıblar.

- Ötən hesabat konsertində rinq heç-heçəylə qurtardı. Və burada sizin xüsusi bir statusunuzun olması da müəyyənləşdi. Növbəti dəfə belə nəticə olsa, yenə də heç kəsi oyundan uzaqlaşdırmayacaqsız?

- O gənclərin hər biri mənə əzizdir, onları şoudan kənarlaşdırmaq mənim üçün çox çətindir. Odur ki, biz razılığa gəldik ki, növbəti konsertlər də heç-heçə olsa, yenidən vaxt ayrılsın və tərəflər bir daha yarışa çıxsın.

Müsavat.-2006.-11 dekabr.-S.14.