Xatun

Teatr beynəlxalq festivaldan qayıdıb

Gənc Tamaşaçılar Teatrının kollektivi Podolskda keçirilən "Uğurlu yollar" adlı II Beynəlxalq Teatr Festivalında iştirak edib. Bu barədə teatrın mətbuat əlaqələndiricisi məlumat yayıb. Xəbərdə deyilir ki, 18 ölkənin peşəkar teatr kollektivinin qatıldığı nüfuzlu festivalın açılışına həsr olunmuş qala-konsertdə teatr Üzeyir Hacıbəyovun "Arşın mal alan" komediyasından parçalarla çıxış edib. Truppanın çıxışını Moskva vilayətinin qubernatoru B.Qromov, vilayətin mədəniyyət naziri Q.Ratnikova və digər rəsmi şəxslər izləyiblər. Qeyd edək ki, festivalda təqdim olunan tamaşaları Mədəniyyət və İncəsənət Universitetinin professoru, sənətşünaslıq doktoru İlham Rəhimlinin qatıldığı tənqidçilər qrupu qiymətləndirib. Festivalın gündəliyinə peşəkar teatr kollektivləri rəhbərlərinin arasında qarşılıqlı sazişlər və tanışlıqlar daxil edilib. Bir həftə davam edən festivalın təntənəli bağlanış mərasimində Azərbaycan nümayəndə heyətinin başçısı, Mədəniyyət və Turizm Nazirliyinin incəsənət şöbəsinin müdiri, əməkdar incəsənət xadimi Əliqismət Lalayevin çıxışı dinlənilib. Təşkilat komitəsi növbəti ildə keçiriləcək eyniadlı festivalda Azərbaycanın teatr kollektivinin mütləq iştirak edəcəyini vurğulayıb. Qeyd edək ki, tədbirin sonunda Gənc Tamaşaçılar Teatrının kollektivinə diplomlar təqdim edilib.

Ayna.-2006.-20 dekabr.-S.8.