Qocayeva Adilə

“Sənətə gəldiyimə peşman deyiləm”

Müsahibimiz musiqili komediya teatrının aktrisası, tamaşaçılar arasında “Şirbalanın Nazlısı” kimi tanınaraq sevilən Lütviyyə Səfərovadır

L.Səfərova ziyalı ailəsində anadan olub. A.Zeynallı adına Musiqi Məktəbini (hazırki Musiqi Kollecini) Pəri Behbudovanın vokal sinfi üzrə, Xarici Dillər institutunu isə ingilis dili ixtisası üzrə bitirib. Bütün bunlara baxmayaraq, taleyini Musiqili Komediya teatrına bağlayıb. Səhnə yaradıcılığı barədə söhbətlərini aktrisanın özündən eşitmək daha yerinə düşər.

- Lutviyyə xanım, siz vokalist olduğunuz halda neca oldu ki, Musiqili Komediya teatrına gəldiniz?

- 1963-cü ildə A. Zeynallı adına Musiqi Məktəbinin III kursunda oxuyarkən Niyazi Şərifov məni Ş.Axundovanın "Ev bizim, sirr bizim" tamaşasında baş rol olan Çiçəyi oynamağa dəvət etdi. Bundan əvvəl isə Musiqi Məktəbində təhsil alanda C.Cabbarlının "Sevil" əsəri tamaşaya qoyulmuşdu . Mən orada Sevili, L.İmanov isə Balaşı oynayırdı. Teatrda oynadığım "Ev bizim, sirr bizim"də tərəf-müqabilim korifey sənətkarımız Nəsibə xanım Zeynalova idi. Musiqili Komediya teatrı aktyordan üç əsas qabiliyyət-oxumaq, oynamaq və aktyorluq tələb edir. Bunların hər üçü məndə olduğuna görə çətinlik çəkməmişəm. Çətinliyim yalnız onda idi ki, rus dilində təhsil aldığıma görə azərbaycanca yaxşı danışa bilmirdim. Səhnə təmiz danışıq dilini mənə öyrətdi.

-Hansı korifey sənətkarlarla işləmisiniz?

- Mənim bir xösbəxtliyim ondadır ki, səhnə sənətimizin qaymaqları ilə işlamişəm. Bunların arasında Şəmsi Bədəlbəyli, Bəşir Səfəroğlu, Lütvəli Abdullayev, Nəsibə Zeynalova, Mobil Əhmədov, Hacı baba Bağırov kimi korifey sənətkarlarımızı xüsusi qeyd etməliyəm. Mən onlardan sənətdə çox şey görüb-götürmüşəm. O dövr aktyor teatra, özünə və rola qarşı olduqca tələbkar idi. Mən əksər hallarda baş rolları ifa etmişəm. Bu, son dərəcə çətin və məsulliyyətli bir işdir. Onu da xüsusi qeyd etməliyəm ki, mənim xalq arasında tanınaraq sevilməyimdə Nəsibə xanımın və Hacıbaba müəllimin böyük rolu olub. Onlarla respublikamızın bütün böl bir sıra yaddaqalan obrazlar yaratmısınız. Bu sahə barədə danışmağınızı istərdik.

- Sənətkarı xalqa tanıdan, sevdirən ən yaxşı vasitə ekran və efirdir. Nəsibə xanımla, Mobil Əhmədovla və Hacıbaba Bağırovla teletamaşalarda bir sıra yaddaqalan obrazlar yaratmışam. Oynadığım tamaşalar radionun qızıl fondunda saxlanılır. Televiziya tamaşalarında obraz yaratmaq səhnədəkindən qat-qat çətin və məsuliyyətlidir. Çünki səhnədə rolu oynayarkən günbəgün püxtələşir, onu inkişaf etdirirsən. Televiziya və radio tamaşalarında isə bir dəfə necə yaratdınsa, eləcə də lentin yaddaşına köçürülərək qalır.

- 65 yaşınızın tamam olmasına az qalıb...

- Mən sənətimi sevirəm, ona bağlıyam. Xalqıma həmişə sədaqətlə xidmət etmişəm. Böyük sənətkarlarla tərəf müqabili olmuşam və bütün bunlar mənəviyyatımı dolğunlaşdırıb, həyatımı mənalı və gözəl edib. Ən başlıcası isə yaratdıqlarımla xalqımın qəlbində yer tuta bilmişəm, deməli, sənətim mənli-mənsiz daim yaşayacaq. Yeganə aktrisayam ki, bu yaşımda hələ də səhnədəyəm. Müəyyən yaşa gələndən sonra bu səhnə üçün vacib olan səs batdığına görə aktyorlar teatrdan gedirlər. Mən isə xarakterik rollara keçərək bu gün də aktrisa kimi fəaliyyət göstərirəm. Bu sənətə gəlməyimə heç vaxt peşman olmamışam.

- Oynamaq istədiyiniz rol varmı?

- Səhnədə olduğum 44 il ərzində istədiyim rolların hamısını oynamışam. Heç bir rolun arxasınca gözüm qalmayıb. Cavanlığıma,

gözəlliyimə, nazıma-duzuma uyğun olaraq mənə tapşırılan bütün rolların öhdəsindən bacarıqla gəlmişəm. İndi yaşlaşmışam, ana, yaşlı qadın rollarını yaradıram. Mənim qızlarımı isə istedadlı aktrisalar -əməkdar artist Xanım Qafarova, Nərgiz Kərimova və başqaları oynayırlar. Mən onların simasında, oyun tərzində öz cavanlığımı görürəm. Xanım mənim kimi vokalistdir və təbii obrazlar yaradır. Hacıbaba müəllimin yaxşı xüsusiyyətlərindən biri də o idi ki, teatrda cavanlara yol açır, inkişafları üçün şərait yaradırdı. İstedadlı gənc aktyorlarla birlikdə səhnəyə çıxaraq onları tanıdır və sevdirirdi. Vaxtilə məni də bu üsulla xalqıma tanıtmışdı.

-Hazırda hansı rol üzərində çalışırsınız?

- Marat Haqverdiyevin "Qısqanc ürəklər" tamaşasında Natella obrazı üzərində işləyirəm. Musiqisi Ramiz Mirişlinindir, rejissoru isə Yusif Əkbarovdur. Çox maraqlı bir tamaşadır bu ilin sonuna kimi təhvil vermək istəyirik. Sonra isə S.Ələsgərovun "Milyonçunun dilənçi oğlu" tamaşasını hazırlayacağıq. Repertuardakı tamaşalardan "Volqalı Canan"da Şəlaləni, "Talelər qovuşanda"da ana- Nazpərini oynayıram. Hacıbaba müəllimin dünyasını dəyişməsi ilə birdən-birə mənim iştirak etdiyim 5 tamaşa repertuardan çıxarıldı. Çünki həmin tamaşalardakı baş rollara Hacıbaba müəllim öz möhürünü elə vurub ki, ondan sonra heç kim həmin rolları onun kimi yarada bilməz.

İki sahil.- 2006.- 7 dekabr.- S.6.