Opera və Balet Teatrında Azərbaycanda Rusiya ilinin təntənəli bağlanış mərasimi keçirildi

Azərbaycan Prezidenti İlham Əliyev mərasimdə iştirak etmişdir

Dekabrın 4-də Azərbaycan Dövlət Akademik Opera və Balet Teatrında Azərbaycanda Rusiya ilinin təntənəli bağlanış mərasimi keçirilmişdir.

Azərbaycan Prezidenti İlham Əliyev mərasimdə iştirak etmişdir. Salona toplaşanlar dövlətimizin başçısını hərarətlə qarşıladılar.

Mərasimi Rusiya hökumətinin sədri Mixail Fradkov açaraq dedi ki, son iki il Rusiya-Azərbaycan münasibətləri tarixində xüsusilə mühüm illərdir. Milli illər mubadiləsi ideyasını prezidentlər İlham Əliyev və Vladimir Putin irəli sürmüşlər. Bu illərin keçirilməsi çoxəsrlik dostluq və mehriban qonşuluq ənənələrinin möhkəmlənməsinə Rusiya və Azərbaycan xalqlarının dərin və səmimi marağının parlaq təzahürü olmuşdur. Həyata keçirilmiş tədbirlər iki dövlətin zəngin potensialını nümayiş etdirdi. Gələcək çoxşaxəli qarşılıqlı əlaqələrin daha da genişlənməsi üçün bu potensialdan istifadə etmək lazımdır.

Mixail Fradkov Azərbaycanda Rusiya ilinə yekun vuraraq dedi: "Biz dost Azərbaycan xalqına müasir Rusiyanın maksimum tam mənzərəsini təqdim etməyə, onun siyasi, iqtisadi, humanitar sahələrdə nailiyyətlərindən danışmağa çalışdıq". M.Fradkov xatırlatdı ki, il çərçivəsində bir sıra mühüm və maraqlı tədbirlər həyata keçirildi. Bu tədbirlərin müvəffəqiyyəti xeyli dərəcədə Azərbaycanda rus mədəniyyətinə, dilinə və ədabiyyatına böyük maraqla şərtlənmişdir. Bu, Rusiya Prezidenti Vladimir Putinin təşəbbüsü və Azərbaycan dövlətinin başçısı İlham Əliyevin himayədarlığı ilə Bakıda keçirilmiş Rus kitabının birinci beynəlxalq festivalının gedişində də öz təsdiqini tapmışdır. Rusiya ili çərçivəsində Azərbaycan tamaşaçıları dünya şöhrətli yaradıcılıq kollektivləri ilə görüşmək imkanı qazandılar. İdman, gənclər və

qeyri-hökumət təşkilatlarının qarşılıqlı əlaqələri gücləndi.

RF hökumətinin başçısı Rusiya ilinə istər öz ölkəsinin, istərsə də Azərbaycan tərəfinin göstərdiyi informasiya dəstəyini də yüksək qiymətləndirdi. Vurğuladı ki, Milli İllərin keçirilməsi zamanı qarşıya qoyulmuş məqsədlərə birbaşa insani ünsiyyət yaradılması, iki ölkənin xalqları arasında qarşılıqlı anlaşma və dostluğun möhkəmlənməsi məqsədlərinə nail olunmuşdur. O, Azərbaycan Prezidentinə, Baş nazirə və ölkəmizdə Rusiya ilinin belə yüksək səviyyədə keçirilməsi üçün səylərini əsirgəməyənlərə təşəkkür etdi. Mixail Fradkov dedi: "Biz Milli illər çərçivəsində yaranmış, dostluq və əməkdaşlıq mühitinin gələcəkdə də saxlanılması və başqa formatda davam etdirilməsi barədə Azərbaycan Prezidentinin ideyasını alqışlayırıq". O, Azərbaycan xalqına firavanlıq, sülh və tərəqqi, Azərbaycan-Rusiya əlaqələrinə isə yeni-yeni nailiyyətlər və perspektivlər arzuladı.

Azərbaycanın Baş naziri Artur Rəsizadə çıxışında bildirdi ki, Azərbaycan və Rusiya prezidentləri İlham Əliyev və Vladimir Putinin Rusiyada Azərbaycan ilinin və Azərbaycanda Rusiya ilinin keçirilməsi barədə təklifi iki ölkənin ictimaiyyəti və yaradıcı kollektivləri tərəfindən geniş dəstəklənmişdir. A.Rasizadə dedi: "Ötən il biz Rusiyada Azərbaycan ilinin uğurla keçməsinin şahidi olduq. Bu gün isə böyük razılıq hissi ilə qeyd edirik ki, Azərbaycanda Rusiya ili ölkələrimiz və xalqlarımız arasında hərtərəfli əməkdaşlığın genişləndirilməsinə xidmət edən parlaq, əlamətdar hadisələrlə dolu tədbir olmuşdur. Fevralın 21-də Bakıda Rusiya ilinin təntənəli açılışı zamanı iki ölkə prezidentlərinin verdikləri ümumi əhval-ruhiyyə ilə başlanan Azərbaycanda Rusiya ili respublikamızın həyatında mühüm ictimai-siyasi hadisəyə çevrilmi§dir".

Artur Rəsizadə vurğuladı ki, Azərbaycan ilə Rusiyanı qədim tarixə malik qarşılıqlı münasibətlər birləşdirir. Xalqlarımız bütün dövrlərdə bir-birinə səmimi hisslər bəsləmişlər və çox mühümdür ki, bizi birləşdirən müsbət nə varsa, qorunub saxlanmış və inkişaf etdirilmişdir. iki ölkə arasındakı münasibətlər ilbəil daha da dinamik və məzmunlu xarakter kəsb edir. Dövlətlərimiz münasibətlərini strateji tərəfdaşlıq ruhunda qurur ki, bu da qonşular arasında əməkdaşlığın necə olmasına yaxşı nümunədir.

Artur Rəsizadə Azərbaycanda Rusiya ilinin keçirilməsində fəal iştirakına görə Rusiya tərəfinə təşəkkürünü bildirdi.

Rəsmi hissədən sonra Rusiya balet ustalarının iştirakı ilə böyük konsert oldu. Konsert proqramına rus va Qərbi Avropa bəstəkarlarının baletlərindən parçalar daxil edilmişdi. Böyük Teatrın və Mariya Teatrının məşhur artistlərinin hər bir çıxışını hərarətlə qarşılayan tamaşaçılar müasir rus balet məktabinin parlaq nümayəndələrinin ustalığına heyranlıqlarını sürəkli alqışlarla ifadə etdilər.

Azərbaycan müəllimi.- 2006.- 8 dekabr.- S.1.