İçərişəhərlə tanışlıq qonaqlarda xoş təəssürat yaratmışdır

AzərTAc xəbər verir ki, ölkəmizdə işgüzar səfərdə olan Səudiyyə Ərəbistanı Krallığının mədəniyyət və informasiya naziri İyad ibn Əmin əl-Mədəni və onu müşayiət edən şəxslər dekabrın 12-də İçərişəhərlə tanış olmuşlar.
Şirvanşahlar sarayından başlanan gəzintini qonaqlar Qız qalasında davam etdirmişlər. Onlara məlumat verilmişdir ki, Bakıda qədim abidələrin qorunub saxlanmasına dövlət tərəfindən diqqət və qayğı göstərilir. Azərbaycan Prezidentinin Sərəncamı ilə "İçərişəhər" Dövlət Tarix-Memarlıq Qoruğu İdarəsi yaradılmışdır.
Şirvanşahlar sarayında Key-Qubad məscidi, Seyid Yəhya Cəlaləddin Bakuvinin türbəsi ilə tanışlıqdan sonra İyad ibn Əmin əl-Mədəni xatirə kitabına ürək sözlərini yazmışdır.
Qonaqlar "Qız qalası" xalça dükanında da olmuş və onlara qədim Azərbaycan xalçaları haqqında ətraflı məlumat verilmişdir.
Qonağı Azərbaycanın Səudiyyə Ərədistanı Krallığındakı səfiri Tofiq Abdullayev və krallığın ölkəmizdəki səfiri Əli Həsən Əhməd Cəffər müşayiət etmişlər.

Azərbaycan.-2006.-13 dekabr.-S.6.