Mədəniyyət Nazirliyində görüş

AzərTAc xəbər verir ki, dekabrın 12-də Azərbaycan mədəniyyət və turizm naziri Əbülfəs Qarayev Səudiyyə Ərəbistanı Krallığının mədəniyyət və informasiya naziri İyad ibn Əmin əl-Mədəni və onu müşayiət edən şəxslərlə görüşmüşdür.
Nazir Ə.Qarayev qonaqları salamlayaraq qeyd etmişdir ki, dövlətlərimizin rəhbərlərinin yüksək münasibətləri ölkələrimiz arasında hərtərəfli əlaqələrin inkişaf etdirilməsində böyük rol oynayır. Bu səfərin gələcəkdə mədəni əlaqələrin genişlənməsində yeni mərhələ açacağına əmin olduğunu vurğulayan Ə.Qarayev diqqətə çatdırmışdır ki, qonaqlar səfər müddətində ölkəmizin görməli yerləri ilə, qədim mədəniyyətimizlə tanış olmaq imkanı qazanacaq, İncəsənət muzeyində, Azərbaycan Dövlət Filarmoniyasında olacaqlar.
İyad ibn Əmin əl-Mədəni qonaqpərvərliklə qarşılandıqları üçün minnətdarlığını bildirmiş, İçərişəhəri gəzdiklərini və Qız qalasında olduqlarını vurğulamışdır. Bildirilmişdir ki, ölkələrimizi bir çox cəhətlər birləşdirir. Ona görə də ardıcıl təcrübə mübadiləsi aparmaq hər iki ölkənin xeyrinə olar.
Görüşdə mədəniyyət sahəsində gələcək əməkdaşlığın inkişaf yolları barədə fikir mübadiləsi aparılmışdır.

Azərbaycan.-2006.-13dekabr.-S.6.