Səudiyyə Ərəbistanının mədəniyyət və informasiya naziri gəlib

Səudiyyə Ərəbistanının mədəniyyət və informasiya naziri İyad Mədəninin rəhbərlik etdiyi 7 nəfərlik nümayəndə heyətinin Azərbaycana səfəri başlayıb. Azərbaycanın Mədəniyyət və Turizm Naziri Əbülfəs Qarayevin dəvəti ilə gələn nümayəndə heyətinin səfəri dekabrın 17-nə qədər davam edəcək. Nazirliyin mətbuat xidmətindən APA-ya verilən məlumata görə, qonaqların mədəniyyət və turizm naziri Əbülfəs Qarayevlə, Azərbaycan Teleqraf Agentliyinin (AzarTac), Azərbaycan Dövlət Televiziya və Radio Verilişləri Qapalı Səhmdar Cəmiyyətinin rəhbərliyi ilə görüşləri nəzərdə tutulub. Yeddi gün ərzində qonaqlar şirvanşahlar Sarayına, Qız qalasına, içərişəhərə baş çəkəcək və M.F.Axundov adına Milli Kitabxanada, Xalça Muzeyində görüşlər keçirəcəklər. Bundan başqa, nümayəndə heyəti Səttar Bəhlulzadə adına Mərkəzi Sərgi Salonunda Azərbaycan Rəssamlar ittifaqının 65 illik yubileyində, M.Maqomayev adına Azərbaycan Dövlət Filarmoniyasında klassik musiqi axşamında iştirak edəcək.

Palitra.- 2006.- 12 dekabr.- S.5.