Turizmin təşkili işi peşəkarlıq tələb edir

Planetimizin hər yerində turizmin inkişafına dövlətlər və sivilazisiyalar səviyyəsində böyük maraq göstərilir. Turizm müasir dövrdə qlobal əhəmiyyətə malik, sosial və iqtisadi əlaqələri tənzimləyən, ölkələr və xalqlar arasında qarşılıqlı münasibətlər yaradan, biznesin əhatə dairəsini genişləndirən xidmət sahəsidir. Keçən əsrin sonlarında dünyada turizmdən əldə edilən gəlirin həcmi 450 milyard dollardan artıq, onun inkişafının orta illik artımı 4,3 faizdən çox olub. Aparılan hesablamalara görə 2020-ci ilə qədər turizm özünün ən yüksək inkişaf həddinə çatacaq, həmin ildə turistlərin sayı 1,5 milyard nəfəri ötəcək.
Azərbaycan da bu inkişafdan geri qalmayacaq. Çünki turizmin sosial-iqtisadi maraqlarının təminatı üçün ölkəmizin kifayət qədər təbii-coğrafi potensialı var. Xəzərin sahilləri, Muğan, Qarabağ, Mil düzləri, dağlarımız, meşələrimiz, çaylarımız, bulaqlarımız, göllərimiz, yaylaqlarımız, tarixi memarlıq abidələrimiz turistlərin cəlb olunması üçün diqqətçəkən obyektlərdir. Sahibkarlıq gücləndikcə bu obyektlərin hər birində turizm mərkəzlərinin təşəkkülü imkanları artır.
Bütün bunlar Mədəniyyət və Turizm Nazirliyinin müvafiq şöbələri tərəfindən hərtərəfli təhlil olunub. Hazırda turizmin maddi-texniki bazası üzərində kompleks iş aparılır. Bakıda, bölgələrdə dünya standartlarına uyğun otellər, əyləncə mərkəzləri, istirahət zonaları şəbəkəsi yaradılır, turizmin təşkilinin müxtəlif forma və metodları tətbiq edilir. Odur ki, peşəkar turizm mütəxəssislərinə çox böyük ehtiyac var. Onlar ayrı-ayrı bölgələrin fiziki və iqtisadi coğrafiyasını dərindən öyrənməli, turizmin təşkilinin təcrübi və elmi əsaslarını işləyib hazırlamağı bacarmalıdırlar.
Mədəniyyət və İncəsənət Universiteti Tətbiqi kulturologiya kafedrasının müdiri İlqar Hüseynovun və Azərbaycanın Macarıstandakı səfirliyinin əməkdaşı, fəlsəfə elmləri namizədi, dosent Nigar Əfəndiyevanın birgə ərsəyə gətirdikləri "Turizmin əsasları" dərsliyi məhz turizm sahəsində çalışanların peşəkarlaşmasına kömək məqsədi daşıyır. Dərsliyin Bakı Kitab Klubunda təqdimatında o, Mədəniyyət və İncəsənət Universitetinin tarixində yenilik kimi qiymətləndirildi. Müəlliflər turizm sahəsinə kompleks şəkildə yanaşmış, turizm elminin müasir tələblərini nəzərə almışlar. Dərslikdə ölkədaxili və beynəlxalq turizmin təcrübəsinə istinad edilib, milli adət və ənənələr, dini xüsusiyyətlər, turizmin sosial-iqtisadi mahiyyəti, tarixi və mənşəyi, tədris problemləri, turizm marketinqi, turizmin idarəedilməsi, turizm əlaqələri, turizmin təşkilinin forma və metodları, növ və tipləri, turist qrupları ilə mədəni-maarifləndirmə işi, dövlətin tənzimləyici rolu, uşaq və yeniyetmələrlə ekskursiya işinin təşkili, digər məsələlər kulturoloji aspektdə tədqiq olunub.
"Mars-Print" Nəşriyyat-Poliqrafiya Firmasında çap edilmiş "Turizmin əsasları" kitabı ali və orta ixtisas məktəblərinin professor-müəllim heyəti, tələbələr, mədəniyyət və incəsənət işçiləri, turizm marketinqi mütəxəssisləri, habelə geniş oxucu kütləsi üçün nəzərdə tutulub.

Azərbaycan.-2007.-19 iyun.-S.6.