Mükərrəmoğlu M.

Mədəniyyət ocaqları diqqət mərkəzindədir

Azərbaycan Respublikası Prezidentinin mədəniyyətimizin müxtəlif sahələrinin inkişafı ilə bağlı imzaladığı sərəncamlarda qarşıya qoyulan vəzifələr artıq öz real həllini tapmaqdadır. Kino, teatr, muzey işi və kitabxanaların yenidən qurulması, onların maddi-texniki bazasının möhkəmləndirilməsi bu sərəncamlarda mühüm yer tutur. Budur, istər regionlarda, istərsə də böyük şəhərlərimizdə yeni mədəniyyət müəssisələri açılır, mövcud müəssisələr əsaslı təmir olunur, yaradıcı prosesə tələbkarlıq artırılır və s.
Paytaxtımızın əsas mədəni mərkəzlərindən biri olan Heydər Əliyev adına Saray təmirə dayandırılmışdır. Kinostudiyada, Akademik Milli Dram Teatrında, Gənc Tamaşaçılar Teatrında da təmir işləri gedir. Yaşıl Teatrın yenidən istifadəyə verilməsi paytaxtın mədəni həyatında çox mühüm hadisəyə çevrildi. Bu sənət ocağının açılışında möhtərəm Prezidentimizin iştirakı mədəniyyətimizə dövlət qayğısının bariz nümunəsidir.
Yaxın vaxtlarda paytaxtımızın Nizami kinoteatrında da əsaslı təmir işlərinə başlanılacaq. Bu kinoteatr dünya standartlarına uyğun müasir səviyyədə qurulacaq.
İndi regionlarımızın da mədəni həyatında əsaslı yeniliklər nəzərə çarpmaqdadır. Demək olar ki, ölkənin bütün regionlarında əhalinin istirahətini təmin etmək üçün yeni parklar salınmaqdadır. Bu yaxınlarda Hacıqabulda iki yeni istirahət parkının inşasına başlanmış və yəqin ki, yaxın günlərdə onlar əhalinin istifadəsinə veriləcəkdir. Onlardan birinin Qurtuluş günü açılışı gözlənilir.
Bu günlərdə isə Xanlar rayonunun Haçaqaya kəndində yeni kitabxana istifadəyə verilmişdir. Yeni, müasir üslubda inşa edilmiş bu kitabxana latın qrafikalı yeni ədəbiyyatla təchiz edilmişdir. Oğuz şəhərində isə “Azərbaycan” kinoteatrının binası əsaslı təmir olunur. Dövlət vəsaiti hesabına həyata keçirilən təmir-bərpa işlərinin müqavilə dəyəri 407 min manatdır. Müqaviləyə uyğun olaraq binanın dam örtüyü əsaslı surətdə dəyişdiriləcək, fasadı rənglənəcək, otaqlar, salon əsaslı təmir olunacaqdır.
Məlumdur ki, uzun illər kitabxanalarımız, mədəniyyət evləri və klublarımız, muzeylərimiz təmirsiz vəziyyətdə qalmışdı. Ona görə də bu sahələr üzrə Dövlət Proqramının qəbul edilməsi söz yox ki, yaxın beş-on il ərzində onların təmir olunub yenidən istifadəyə verilməsi üçün imkanlar yaradacaqdır.
Mədəniyyət ocaqlarının əsaslı şəkildə yenidən qurulması çox vacibdir. Bunu möhtərəm Prezidentimiz öz çıxışlarında dəfələrlə vurğulamışdır. Prezidentimizin son sərəncam və göstərişləri bir daha təsdiq edir ki, dövlətimiz milli mədəniyyətimizin inkişafı üçün xüsusi qayğı göstərir və yaxın gələcəkdə Azərbaycanda mədəniyyət sürətli inkişaf yoluna qədəm qoyacaqdır.

Xalq qəzeti.- 2007.- 7 iyun.- S. 9.