Dünya şöhrətli müğənni Bülbülün 110 illik yubileyi qeyd edilir

İyunun 22-də Azərbaycan vokal sənətinin inkişafında mühüm rol oynamış dünya şöhrətli müğənni, SSRİ xalq artisti Bülbülün 110 illik yubileyi münasibətilə dövlət və hökumət nümayəndələri, tanınmış sənət adamları, musiqiçilər və gənc sənətçilər Fəxri Xiyabana gələrək, böyük sənətkarın xatirəsini anmış, məzarı önünə əklil qoymuşlar.
Mərasimdə çıxış edən Baş nazirin müavini, xalq yazıçısı Elçin bildirmişdir ki, Azərbaycanın professional vokal məktəbinin banisi olan Bülbül gənc ifaçıların yetişməsinə, püxtələşməsinə böyük əmək sərf etmişdir. Məlahətli səsi ilə könüllərə hakim kəsilmiş bu böyük opera müğənnisi Azərbaycanın ayrılmaz hissəsi olan Dağlıq Qarabağda, Şuşada dünyaya göz açmışdır.
Natiq vurğulamışdır ki, Azərbaycan xalq mahnılarının, təsniflərinin, vokal əsərlərinin bənzərsiz ifaçısı Bülbülün ölməz xatirəsi xalqımız tərəfindən daim hörmət və ehtiramla anılacaqdır.
Mədəniyyət və turizm naziri Əbülfəs Qarayev geniş səs imkanlarına malik, ifaçılığında milli vokal üslubu ilə italyan vokal məktəbi ənənələrini üzvi şəkildə birləşdirmiş Bülbülün Azərbaycan mədəniyyətinin inkişafındakı əvəzsiz xidmətlərindən danışmışdır. Ə.Qarayev Prezident İlham Əliyevin müvafiq sərəncamı ilə görkəmli müğənninin 110 illik yubileyinin dövlət səviyyəsində qeyd edilməsinin əhəmiyyətini vurğulamış, orta və ali musiqi məktəblərində keçirilmiş xatirə tədbirlərindən danışmışdır.
Nazir diqqətə çatdırmışdır ki, cari ilin noyabrında vokalçıların Bülbül adına IV Beynəlxalq müsabiqəsi keçiriləcək və həmin tədbirdə ölməz sənətkarımızın işıqlı xatirəsi dünyanın bir çox ölkələrini təmsil edən gənc ifaçılar tərəfindən bir daha anılacaqdır.
Azərbaycan Bəstəkarlar İttifaqının yeni seçilmiş sədri, xalq artisti, professor Firəngiz Əlizadə geniş diapazonlu, məlahətli səsə malik olan müğənninin aktyorluq sənətindən söz açaraq, onun yaratdığı obrazların tamaşaçılar tərəfindən böyük sevgi və məhəbbətlə qarşılandığını bildirmişdir. Qeyd edilmişdir ki, Bülbül, həmçinin Azərbaycan milli vokal məktəbi ənənələrinin tədqiqi və Avropa opera mədəniyyəti ilə bu ənənələrin sintezinə dair bir çox sanballı əsərlərin müəllifidir. Böyük sənətkarın təşəbbüsü ilə Dövlət Konservatoriyası nəzdində xalq musiqisini öyrənən elmi-tədqiqat kabinetinin yaradıldığını xatırladan F.Əlizadə, bu kabinetin fəaliyyəti sayəsində “50 Azərbaycan el mahnısı”, “Azərbaycan xalq mahnıları” və digət topluların çap edildiyini söyləmişdir.
Görkəmli müğənninin oğlu, Azərbaycanın Rusiyadakı səfiri, xalq artisti Polad Bülbüloğlu atasının anım mərasiminə toplaşan insanlara ailəsi adından dərin təşəkkürünü bildirərək qeyd etmişdir ki, ulu öndər Heydər Əliyevin sərəncamı ilə Bülbülün 100 illik yubileyi çox geniş şəkildə qeyd edilmişdir. Onun 110 illik yubileyinin keçirilməsi ilə bağlı Prezident İlham Əliyevin müvafiq sərəncamını Azərbaycan mədəniyyətinin inkişafına göstərilən ən yüksək diqqət və qayğı kimi qiymətləndirən səfir diqqətə çatdırmışdır ki, dekabrın 7-də Dövlət Opera və Balet Teatrında Bülbülün 110 illik yubileyinə həsr olunmuş gecə keçiriləcəkdir.
Polad Bülbüloğlu bildirmişdir ki, Bülbülün yubileyinin dövlət səviyyəsində, ümumxalq bayramı kimi qeyd edilməsi Azərbaycanın mədəniyyət beşiyi olan Şuşanı və ümumiyyətlə, Qarabağ musiqisini, onun vokal məktəbini bir daha zirvələrə qaldırmaq deməkdir.
Mərasim Bülbül Fondunda ziyafətlə davam etdirilmişdir.
Anım mərasimində Prezidentin İcra Aparatının humanitar siyasət məsələləri şöbəsinin müdiri Fatma Abdullazadə, sənaye və energetika naziri Natiq Əliyev, Qafqaz Müsəlmanları İdarəsinin sədri şeyxülislam Allahşükür Paşazadə, Milli Konservatoriyanın rektoru, xalq artisti Siyavuş Kərimi və digər rəsmi şəxslər iştirak etmişlər.

Xalq qəzeti.- 2007.- 23 iyun.- S. 6.