İbrahimova S.

Musiqimiz dünya səhnələrində səsləndirilməlidir"

Bəstəkarlar İttifaqının qurultayında bu məqam önə çəkilib

Müslüm Maqomayev adına Azərbaycan Dövlət Filarmoniyasında Bəstəkarlar İttifaqının növbəti - VIII qurultayı açılıb. Fəxri Xiyabanda görkəmli şəxsiyyətlərin məzarlarını ziyarətdən sonra qurumun birinci katibi Ramiz Zöhrabov qurultayın gündəliyi, bəstəkarların son 10 ildə yazılmış yeni əsərlərinin ifa edilməsi, qurultayın davam edəcəyi günlərdə paytaxtın müxtəlif salonlarında keçiriləcək konsert proqramları haqqında məlumat verərək bildirib ki, qurultaya Türkiyə, Ukrayna, Gürcüstan, Özbəkistan, Tacikistan və digər ölkələrdən qonaqlar iştirak edirlər.

Mədəniyyət və turizm naziri Əbülfəs Qarayev Azərbaycanın müstəqilliyi dövründə qurumun ilk qurultayı olduğunu diqqətə çatdırıb. Xatırladaq ki, sonuncu qurultaydan 17 il ötür. O, Bəstəkarlar İttifaqının yaranma tarixini xatırladaraq yaradıcı təşkilatın 1934-cü ildə SSRİ Bəstəkarlar İttifaqının respublika şöbəsi kimi fəaliyyətə başladığını diqqətə çatdırıb: "Quruma görkəmli bəstəkarlar rəhbərlik edib. İttifaqın nüfuzunu qorumaq üçün qarşıda çox mühüm vəzifələr durur. Düşünürəm ki, bu istiqamətdə başlıca məqam Azərbaycan musiqisini beynəlxalq miqyasda tanıtmaq, onu dünya səhnələrində səsləndirməkdir".

Tədbirin davamında qurultayın proqramına uyğun olaraq bəstəkarların əsərləri səsləndirilib. İki hissədən ibarət simfonik konsertdə Üzeyir Hacıbəyovun "Koroğlu" operasından üvertura, Arif Məlikovun və Firəngiz Əlizadənin 8 nömrəli simfoniyası, Aqşin Əlizadənin xor və simfonik orkestr üçün "Ana torpaq", Musa Mirzəyevin "Doğma Azərbaycan" oratoriyası, Tofiq Bakıxanov, Oqtay Zülfüqarov, Azər Dadaşov, Rauf Əliyev və Vasif Allahverdiyevin əsərlərini Ü.Hacıbəyov adına Azərbaycan Dövlət Simfonik Orkestri Rauf Abdullayevin diriyorluğu ilə səsləndirib.

Kaspi.-2007.-13 iyun.-S.17.