Mahnı Teatrında Rəşid Behbudovun xatirəsinə həsr olunmuş müəllif konserti

İyunun 9-da Rəşid Behbudov adına Dövlət Mahnı Teatrında bəstəkar İlham Abdullayevin görkəmli sənətkar, dünya şöhrətli müğənni Rəşid Behbudovun xatirəsinə həsr edilmiş müəllif konserti olmuşdur.

Tədbirdən əvvəl görkəmli müğənninin adını daşıyan mahnı teatrının kollektivi, onun ailə üzvləri və Rəşidsevərlər Fəxri xiyabana gəjərək, Rəşid Behbudovun məzarını ziyarət etmişlər. Mədəniyyət və Turizm Nazirliyinin təşkilatçılığı ilə keçirilən konsertdə bəstəkar İlham Abdullayevin müxtəlif janrlarda əsərləri səslənmişdir. Bu əsərləri məlahətli səsi və orijinal ifa tərzi ilə qəlblərdə yaşayan unudulmaz müğənninin qızı, Əməkdar artist Rəşidə Behbudova, bəstəkar İ.Abdullayev və onun fortepianoda müşayiəti ilə Leyla Qafari (vokal), Davud Əsgərli (vokal), Vüqar Süleymanov (tar), Bülbül adına Orta İxtisas Musiqi Məktəbinin şagirdləri Nailə Məmmədova (skripka), Nəzrin Məmmədova (skripka), Ağaəli Babayev (qaboy), Yəhya Qarayev (alt), Bəhruz Zeynalov (tar), "Təbəssüm" qrupu və başqaları ifa etmişlər.

Tamaşaçılar bəstəkar İlham Abdullayevin "Hamı qonaq bu dünyaya", "Vokaliz", "İthaf', "Aşıqsayağı", "Çətir", "Mehriban qızlar" və digər mahnılarını, tar, skripka və fortepiano üçün əsərlərini rəğbətlə qarşılamışlar. Böyük sənətkar Rəşid Behbudova ithaf olunan əsərlər iştirakçıların qəlbində xoş duyğular oyatmışdır

Respublika.- 2007.- 10 iyun.- S. 7.