GUAM-ın Bakı zirvə görüşündə əməkdaşlığa dair sənədlər imzalanmışdır

İyunun 19-da Demokratiya və İqtisadi İnkişaf Uğrunda Təşkilat - GUAM ölkələri dövlət başçılarının Bakıda keçirilən 2-ci zirvə görüşü çərçivəsində müxtəlif sahələrdə əməkdaşlığa dair bir neçə sənəd imzalanmışdır.
GUAM-ın imtiyazları və immunitetlərinə dair sazişi Azərbaycan, Gürcüstan və Ukraynanın xarici işlər nazirləri Elmar Məmmədyarov, Gela Bejuaşvili, Arseni Yatsenyuk, Moldova adından isə xarici işlər və Avropa inteqrasiyası nazirinin müavini Valeri Ustalov imzaladılar.
GUAM-ın üzvü olan ölkələrin hökumətləri arasında yüklərin beynəlxalq multimodal daşınması haqqında sazişi Ukraynanın xarici işlər naziri Arseni Yatsenyuk, Azərbaycanın nəqliyyat naziri Ziya Məmmədov, Gürcüstanın iqtisadi inkişaf nazirinin müavini Kaxa Damenya və Moldovanın xarici işlər və Avropa inteqrasiyası nazirinin müavini Valeri Ustalov, GUAM ölkələrinin 2007-2010-cu illərdə mədəniyyət sahəsində əməkdaşlığı haqqında protokolu Azərbaycanın mədəniyyət və turizm naziri Əbülfəs Qarayev, Ukraynanın xarici işlər naziri Arseni Yatsenyuk, Gürcüstanın mədəni abidələrin qorunması və idman naziri Georgi Qabaşvili və Moldovanın xarici işlər və Avropa inteqrasiyası nazirinin müavini Valeri Ustalov imzaladılar.
Azərbaycanın fövqəladə hallar naziri Kəmaləddin Heydərov, Gürcüstanın energetika naziri Nika Gilauri, Ukraynanın xarici işlər naziri Arseni Yatsenyuk, Moldovanın xarici işlər və Avropa inteqrasiyası nazirinin müavini Valeri Ustalov Nüvə və radiasiya təhlükəsizliyi məsələlərində qarşılıqlı yardıma dair memorandumu imzaladılar.

Azərbaycan.- 2007.- 20 iyun.-S. 5.