Qasımov A.

Azərbaycan-Türkiyə dostluğuna layiqli töhfələr verməyi hər kəs özünə borc bilir

Qardaş ölkənin Bursa şəhərində Azərbaycan-Türkiyə qardaşlığı parkı"nın salınması bunun əyani sübutudur

Müstəqillik qazandıqdan sonra Azərbaycana siyasi-ideoloji və sosial-iqtisadi sahələrdə dəstək olan, dövlət müstəqilliyimizi tanıyan ilk ölkə Türkiyə oldu. Beynəlxalq arenada da bu addıma təbii yanaşıldı. Eyni kökdən, eyni soydan olan iki qardaş ölkənin bir-birinə dayaq olması, səsinə səs verməsi labüd idi və böyük dövlətçilik tarixi və zəngin idarəetmə təcrübəsi olan qardaş Türkiyənin daim Azərbaycanın yanında olması hər birimizin qəlbində qanuni iftixar hissi oyadır. Türkiyə Cümhuriyyətinə gələn, burada böyüklüyündən-kiçikliyindən asılı olmayaraq istənilən tədbirə qatılan, qardaş məclisində görünən, iş quran, təhsil alan, səyahətə çıxan soydaşlarımızın hər biri dediklərimizi dərhal təsdiqləyər.
Mayın 30-dan iyunun 1-dək Bursa vilayətində keçirdiyimiz görüşləri, bu görüşlərin xoş təəssüratını çox güman ki, səfər yoldaşlarımın hamısı uzun müddət xatırlayacaq, ürəklərində bu səfərdən doğan məmnunluq hissini əziz duyğular təki yaşadacaqlar. Paytaxtın Nizami bələdiyyəsi ilə dostluq və qardaşlıq əlaqələri yaradan Bursa vilayətinin Nilufər bələdiyyəsinin təşəbbüsü ilə Türkiyənin bu gözəl kurort şəhərində "Azərbaycan-Türkiyə qardaşlığı parkı"nın açılışı münasibətilə düzənlənən tədbirdə ölkəmizin nümayəndə heyətinin iştirakı vilayətin siyasi elitasında, ictimaiyyət arasında əsl bayram ovqatı yaratmışdı. Parkın girəcəyindəki lövhələrdə yazılmış türk dünyasının böyük oğlu Mustafa Kamal Paşa Atatürkün "Azərbaycanın sevinci bizim sevincimiz, kədəri bizim kədərimizdir" və ümummilli liderimiz Heydər Əliyevin "Biz bir millət, iki dövlətik" sözlərini oxuyarkən hansı hisslər keçirdiyimi ifadə etməyə çətinlik çəkirəm. Bu iki dahi şəxsiyyətin vaxtı ilə söylədikləri fəlsəfi fikirlərin həyatda özünü necə doğrultmasını, tarixləşməsi faktlarını əyani olaraq müşahidə etmək qardaş ölkə vətəndaşları və biz Azərbaycan türkləri üçün əsl səadətdir. Mən bunu Bursada salınan yeni parkın açılışı mərasimində bir daha yəqinləşdirdim.
Nümayəndə heyətinin rəhbəri, Prezident Aparatı ictimai-siyasi şöbəsinin müdiri Əli Həsənovun, Bursa vilayəti rəhbərlərinin, Nilufər bələdiyyəsi başqanının və digər natiqlərin çıxışlarında ölkələrimiz arasında dostluq və qardaşlıq əlaqələrinin geniş spektrdə inkişafı barədə əhatəli söhbət getdi. Əli Həsənov son illərdə bu əməkdaşlığın daha da genişləndiyini, bir sıra sahələri əhatə etdiyini bildirdi. Onu da xüsusi vurğuladı ki, Azərbaycan Prezidenti İlham Əliyevin dövlətçilik və siyasi fəaliyyətində qardaş Türkiyə ilə əlaqələrin intensivləşdirilməsi, xalqlarımızın bir-birinə daha da yaxınlaşdırılması mühüm yer tutur. Ulu öndər həmişə Türkiyə Cümhuriyyəti ilə dostluğa xüsusi önəm verərdi və bu əzəli prinsiplər bu gün də dövlətimiz tərəfindən ardıcıllıqla davam etdirilir. Türkiyənin regionda qüdrətli, sayılıb-seçilən dövlətə çevrilməsi Azərbaycanın da siyasi kursuna tam uyğundur və ölkəmizin nüfuzunu artıran amillərdəndir. Bu dostluğun əbədiliyinə, sarsılmazlığına heç kimdə zərrə qədər də şübhə olmamalıdır. "Azərbaycan-Türkiyə qardaşlığı parkı"nın açılışı mərasimində söylənilən fikirlərin leytmotivini məhz bu nüanslar təşkil edirdi.
Yeni mədəniyyət və istirahət parkının salınması ideyası birdən-birə yaranmayıb. Nizami bələdiyyəsi ilə Nilufər bələdiyyəsi hələ 2004-cü ildən dostluq əlaqələrinin yaradılmasına səy göstəriblər. Ölkəmizdə fəaliyyət göstərən iş adamı, Eski Emniyyət müdiri Osman Gezeker ilk dəfə bu təşəbbüslə müraciət etmişdir. O vaxtlar Dövlət Gömrük Komitəsinin sədri işləyən, hazırda fövqəladə hallar naziri Kəmaləddin Heydərovun bu istəyin reallaşmasında müstəsna xidmətlərini qeyd etmək istərdim. Kəmaləddin müəllim bu xeyirxah təşəbbüsün hər iki tərəfə böyük faydalar verəcəyini vurğulamışdı və zaman bu proqnozun doğruluğunu sübut etdi. Nilufər bələdiyyəsinin nümayəndələri 2005 və 2006-cı illərdə də Bakıda oldular, əməkdaşlığın perspektivləri müəyyənləşdirildi. Əlbəttə, səfərlərin başlıca məqsədi hər iki tərəfin qazandığı təcrübənin öyrənilməsi, tətbiqi, qarşılıqlı yardım prosedurlarının həyata keçirilməsi idi. Bu il mayın 10-dan 17-dək Türkiyə nümayəndə heyətinin Bakıda olması, mayın axırlarında isə bizim Bursaya getməyimiz dostluq və qardaşlıq ənənələrinin möhkəmlənməsi yolunda mühüm addımlar kimi dəyərləndirilməlidir.
Bursa şəhərinin axarlı-baxarlı guşəsində salınan "Azərbaycan-Türkiyə qardaşlığı parkı" Türkiyənin tanınmış memarı Çingiz Yıldızın layihəsi əsasında araya-ərsəyə gəlib. Şəhər gözəlliyinə, təbii şəraitinə, coğrafi mühitinə görə bu ölkədə barmaqla göstərilir. Məşhur Uludağ qış turizm kompleksi də Bursadadır. Burada bizə 600 yaşı olan, eynilə Gəncə çinarlarını xatırladan xan çinarları göstərdilər. Meşələri, yaşıl yamacları ilə öyünən Bursa böyük bir ərazini tutan "Azərbaycan-Türkiyə qardaşlığı parkı" ilə bir az da gözəlləşib. Bu mədəniyyət və istirahət guşəsində uşaqların, gənclərin, yaşlı insanların əylənməsi, istirahəti üçün hər cür şərait yaradılıb. İdman meydançaları , kafelər, çayxanalar və digər əyləncə və ictimai-iaşə obyektləri bura gələnlərin, qonaqların ixtiyarındadır. Onu da deyim ki, park bütünlüklə Nilufər bələdiyyəsinin vəsaiti ilə salınıb. Parkın açılışında bu fakt xüsusi vurğulandı və əməkdaşlıq etdiyimiz qurumun nəcib təşəbbüsünə yüksək qiymət verildi. Mərasimə toplaşanlar Milli Məclisin deputatları - Fəttah Heydərovu, Nizami Cəfərovu, Bəxtiyar Sadıqovu, Tahir Rzayevi, Mirkazım Kazımovu, ölkəmizin İstanbuldakı baş konsulu Səyyad Aranı, digər qonaqları səmimiyyətlə qarşıladılar. Millət vəkillərindən ibarət nümayəndə heyətinin Bursaya səfərinin yaxşı nəticələr verəcəyinə inam ifadə olundu. Azərbaycan incəsənət ustalarının, xüsusən folklor qruplarının və rəqqasların çıxışları toplaşanların alqışına səbəb oldu.
Nilufər bələdiyyəsi Türkiyədə öz təşəbbüskarlığı, faydalı, səmərəli işləri ilə tanınır, qiymətləndirilir. 34 nəfər bələdiyyə üzvünün hər biri insanlarla təmasda, əhalinin arzu və istəklərinin reallaşdırılmasında ad qazanıb. Bu bələdiyyə cəmiyyətə inteqrasiya sahəsində bir növ təcrübə məktəbi kimi də tanınır. Maddi imkanları genişdir, arzuların, planların həyata keçirilməsinə bu amil mühüm şərait yaradır. Əlbəttə, hələ təcrübəsi az olan, inkişaf yolunu seçən Nizami bələdiyyəsinin Nilufər bələdiyyəsindən öyrənəsi çox işlər var və səfərimiz vaxtı bu məsələləri də önə çəkdik. Mən də öz növbəmdə gördüyümüz işlərdən, gələcəkdə həyata keçirəcəyimiz tədbirlərdən danışdım, Nizami bələdiyyəsinin əhalinin sosial vəziyyətinin yaxşılaşdırılması, məhəllələrin, küçələrin abadlaşdırılması, digər sosialyönümlü işlərin görülməsi ilə bağlı ideyalarını dostlarımıza çatdırdım. Bildirdim ki, son illər bələdiyyələrin inkişafı baxımından ölkə qanunvericiliyi xeyli təkmilləşdirilmiş, inkişaf etdirilmişdir. Yerli iqtisadi, sosial, ekoloji məsələlərin həlli birbaşa bələdiyyələrə həvalə olunub. 2007-ci ildə də ötən ilki nailiyyətləri təkrarlamağı qarşısına məqsəd qoyan Nizami bələdiyyəsi hər bir müraciətə vaxtında cavab verməyi, ayrılan büdcəsinin insanların rifah halının yaxşılaşdırılmasına, ərazinin abadlaşdırılmasına, kütləvi tədbirlərin daha məzmunlu keçirilməsinə yönəldilməsini qərara alıb. Onu da çatdırdım ki, nailiyyətlər yalnız düzgün və vaxtında qəbul edilmiş rasional qərarlar nəticəsində qazanılır. Dediklərimi bursalı həmkarlarım, xüsusilə Nilufər bələdiyyəsinin başqanı Mustafa Bozbəy razılıqla qarşıladılar və onlar birmənalı olaraq bildirdilər ki, Nizami bələdiyyəsindən də öyrəniləsi işlər çoxdur.
Nümayəndə heyətimizin Türkiyəyə səfəri, Bursada keçirdiyimiz tədbirlər, dostlarımızla görüşlərimiz bir daha təsdiqlədi ki, Türkiyə-Azərbaycan dostluğu əbədidir, sarsılmazdır. Bu birliyi qorumaq, yaşatmaq isə yalnız dövlət rəhbərlərinin, iqtidar yetkililərinin deyil, hər bir Türkiyə və Azərbaycan vətəndaşının müqəddəs borcudur.

Azərbaycan.-2007.-7 iyun.-S.8.