Azərbaycan bəstəkarlarının VIII qurultayı açılmışdır

İyunun 11-də Müslüm Maqomayev adına Azərbaycan Dövlət Filarmoniyasında Azərbaycan Bəstəkarlar İttifaqının növbəti VIII qurultayı açılmışdır.
Qurultay işinə başlamamışdan əvvəl iştirakçılar Heydər Əliyev adına Sarayın qarşısındakı parka gələrək, müstəqil Azərbaycan dövlətinin memarı və qurucusu, ulu öndər Heydər Əliyevin xatirəsini ehtiramla anmış, abidəsi önünə əklil və təzə tər güllər qoymuşlar.
Qurultay iştirakçıları Fəxri xiyabanda Üzeyir Hacıbəyov, Qara Qarayev, Fikrət Əmirov, Tofiq Quliyev, Niyazi, Vasif Adıgözəlov və digər görkəmli bəstəkarların məzarlarını ziyarət etmiş, dahi bəstəkar Üzeyir Hacıbəyovun Bakı Musiqi Akademiyasının qarşısındakı abidəsinin önünə güllər düzmüşlər.
Azərbaycan Bəstəkarlar İttifaqının birinci katibi, professor Ramiz Zöhrabov qurultayın gündəliyi, Azərbaycan bəstəkarlarının son 10 ildə yazılmış yeni əsərlərinin ifa edilməsi, qurultayın davam edəcəyi günlərdə paytaxtın müxtəlif salonlarında keçiriləcək konsert proqramları haqqında məlumat vermiş, qurultaya Türkiyə, Ukrayna, Gürcüstan, Özbəkistan, Tacikistan və digər ölkələrdən gəlmiş qonaqları təqdim etmişdir.
Mədəniyyət və turizm naziri Əbülfəs Qarayev iştirakçıları salamlayaraq bugünkü tədbirin Azərbaycanın müstəqilliyi dövründə Bəstəkarlar İttifaqının ilk qurultayı olduğunu nəzərə çarpdırmışdır. Natiq bildirmişdir ki, sonuncu qurultaydan 17 il ötmüşdür. Ə.Qarayev Azərbaycan Bəstəkarlar İttifaqının yaranma tarixini xatırladaraq demişdir ki, bu yaradıcılıq təşkilatı 1934-cü ildə SSRİ Bəstəkarlar İttifaqının respublika şöbəsi kimi fəaliyyətə başlamışdır.
Ötən dövrdə bu təşkilat peşəkar bəstəkarlar və musiqişünasların yaradıcılığının formalaşmasında mühüm rol oynamışdır. Bu ittifaqa Azərbaycanın görkəmli bəstəkarları rəhbərlik etmişlər. Bu gün Bəstəkarlar İttifaqı Azərbaycanda ən nüfuzlu təşkilatlardan biridir. Bu nüfuzu yüksəltmək üçün qarşıda çox mühüm vəzifələr durur. İndi əsas vəzifə Azərbaycan musiqisini beynəlxalq miqyasda tanıtmaq, onu dünya səhnələrində səsləndirmək və zəngin mədəniyyətimizi təbliğ etməkdir.
Müasir Azərbaycan musiqi mədəniyyətinin çox zəngin bir bəstəkarlıq məktəbi üzərində qurulduğunu vurğulayan Ə.Qarayev qeyd etmişdir ki, ulu öndərimiz Heydər Əliyev bəstəkarlara və musiqiçilərə daim diqqət və qayğı göstərirdi. Yeniləşən Azərbaycanda bu qayğını Prezident İlham Əliyev uğurla davam etdirir.
Natiq Prezident İlham Əliyevin adından qurultay iştirakçılarını təbrik etmiş, onun işinə uğurlar arzulamış, Azərbaycan bəstəkarlarının qurultayına gəlmiş xarici qonaqlara minnətdarlığını bildirmişdir.
Sonra qurultayın proqramına uyğun olaraq görkəmli bəstəkarların əsərləri səslənmişdir. İki hissədən ibarət simfonik konsertdə Üzeyir Hacıbəyovun "Koroğlu" operasından uvertüra, Arif Məlikovun və Firəngiz Əlizadənin ümummilli liderimiz Heydər Əliyevə həsr etdikləri 8 nömrəli Simfoniya, "İthaf", Aqşin Əlizadənin xor və simfonik orkestr üçün "Ana torpaq", Musa Mirzəyevin "Doğma Azərbaycan" oratoriyası, Tofiq Bakıxanov, Oqtay Zülfüqarov, Azər Dadaşov, Rauf Əliyev və Vasif Allahverdiyevin əsərləri səslənmişdir.
Bu əsərləri Üzeyir Hacıbəyov adına Azərbaycan Dövlər Simfonik Orkestri (bədii rəhbər və baş dirijor, xalq artisti, professor Rauf Abdullayev), Azərbaycan Dövlət Xor Kapellası (bədii rəhbər və baş dirijor, xalq artisti, professor Gülbacı İmanova), solistlər - xalq artisti, professor Ramiz Quliyev (tar), vokalçıların Bülbül adına Beynəlxalq Müsabiqəsi laureatı Fəridə Məmmədova (vokal), Səbinə Əsədova (vokal), Babək Niftəliyev (xanəndə), Əminə Zülfüqarova (fleyta) ifa etmişlər.
Azərbaycan bəstəkarlarının VIII qurultayı öz işini davam etdirir.

Azərbaycan.-2007.-12 iyun.-S.7.