İsrailli zərb ustası Bakının qonağıdır

“Azərbaycan musiqisini, muğamı, xüsusilə də Alim Qasımovun sənətini çox bəyənirəm. Onunla bir yerdə çalışmışıq. Amma yenə də birgə layihədə çalışmaq istərdim. Azərbaycan və Türkiyə köklü ölkə olduğundan musiqi tarixi də qədimdir. İsrail isə gənc ölkədir. İsraildə digər ölkələrdən gəlmələr çox olduğu üçün onun musiqisində yetərincə dəyişiklik, müxtəliflik var”. Bu sözləri Bakıda turnedə olan bəstəkar və zərb ustası Yinon Müallem söyləyib. Azərbaycan və İsrail diplomatik əlaqələrinin 15-ci ili münasibətilə Dövlət Filarmoniyasında konsert verən ifaçı proqrama İsrail səfirliyi tərəfindən hələ 3-4 ay bundan öncə dəvət aldıqlarını və Bakıda olduğundan məmnunluq hissi keçirdiyini bildirib.

Yinon Müallem 1968-ci ildə İsraildə anadan olub. 1949-cu ildə valideynləri İraqdan İsrailə köçüb. Atası hüquqşünas olsa da, musiqiyə daha çox meyl edir. Musiqiyə olan istək isə Yinona elə atasından keçir. Yaradıcılığına latın zərb alətləri ilə başlasa da, sonralar Şərq musiqisinə üstünlük verib. İfa etdiyi darbuka, dəf, kanrıja, gatham kimi bir çox çalğı alətlərində özünə sərbəst, azad bir musiqi janrı seçir. 1998-ci ildə isə ud ifa etmək eşqinə düşən Yinon Türkiyənin tanınmış ud ustası Yurdal Tokcan ilə birgə çalışmaq üçün İstanbula üz tutur. Və o alətin də sirlərinə, zəngin aləminə bələd olur. Yunanıstandan Ross Daily, Türkiyə və ABŞ-dan Ömər Faruk, Azərbaycandan Alim Qasımov, Hindistandan Subaş Çhandran və Ganeş Kumar, İsraildən Elya Sela kimi sənətkarlarla çalışan Yinon musiqilərini yalnız bir janra sığdıra bilmir. Bir üslub onun üçün yetərli deyil. O, Yaponiya, Türkiyə, İspaniya, ABŞ, Belçika, İngiltərə, Fransa kimi ölkələrdə müxtəlif festival və konsertlərdə iştirak edib. İlk albomu Changing Moments 2003, ikinci albomu Klezmer for the Sultan 2005-ci ildə işıq üzü görüb. Hazırda yaradıcılığını Türkiyədə davam etdirir. 2005-ci ildə isə Yinon Müallem Ansamblını yaradır. Qrup üzvləri fərqli janrda yetərincə usta olan musiqiçilərdən ibarətdir.

Yeni Azərbaycan.-2007.-22 iyun.-S.8.