Ankarada Türkdilli Ölkələrin Milli Kitabxanalarının Konfransı açılıb

Bugünlərdə Ankarada Türkdilli Ölkələrin Milli Kitabxanaları Konfransının (TÖMKK) ilk toplantısı olub. Bu barədə APA-ya M.F.Axundov adına Milli Kitabxananın direktoru Kərim Tahirov məlumat verib. Onun bildirdiyinə görə, belə bir təşkilatın yaranması təklifi ilə ötən ilin dekabrında Türkiyədə keçirilən TÜRKSOY-un yığıncağında mədəniyyət və turizm naziri Əbülfəs Qarayev çıxış edib. Türkdilli ölkələrin kitabxana sisteminin yaxşılaşdırılması məqsədi ilə yeni yaradılan qurumun toplantısı iki ildən bir keçiriləcək. Hər toplantıda qurumun yeni sədri seçiləcək. Ankara toplantısında qurumun ilk sədri seçilib. TÖMKK-in ilk sədri Türkiyə Milli Kitabxanasının direktoru Tüncel Acar olub. Konfransda türkdilli ölkələrin milli kitabxanalarının əlaqəsi, türk xalqlarının tarixi, ədəbiyyatının mühafizəsi və təbliği məsələləri, toplu kataloqların nəşri müzakirə edilib. Toplantıda Türkdilli ölkələrin Milli Kitabxanalarında qorunan əlyazmaların toplu kataloqunun nəşr olunması planlaşdırılıb.

525-ci qəzet.-2007.-15 iyun.-S.25.