MDB İcraiyyə Komitəsinin Azərbaycan kitabxanalarına hədiyyəsi

İyunun 5-də M.F.Axundov adına Azərbaycan Milli Kitabxanasında MDB-nin İcraiyyə Komitəsinin sədri - icraçı katibi, MDB ölkələrinin iqtisadi inkişafının dəstəklənməsi fondunun rəhbəri Vladimir Ruşaylo ilə görüş keçirilmişdir. O, ölkəmizin kitabxanalarına rus dilində 10 min nüsxə ədəbiyyat hədiyyə etmişdir.
Azərbaycanın mədəniyyət və turizm naziri Əbülfəs Qarayev demişdir ki, bu görüş humanitar əlaqələrin möhkəmləndirilməsinə yönəldilmişdir. Son illər MDB-nin bütün ölkələrində bu cür tədbirlər həyata keçirilir. Rus dili ili çərçivəsində Bakıda Rus kitabı festivalı keçirilmişdir. Respublikamız bütün kitab yarmarkalarında, "Kitab sənəti" müsabiqəsində iştirak etmişdir. MDB İcraiyyə Komitəsinin qərarı ilə Azərbaycana fəlsəfə, sosiologiya və iqtisadiyyata dair kitablar, habelə rus klassiklərinin və xarici klassiklərin əsərləri hədiyyə olunmuşdur. Mədəniyyət və Turizm Nazirliyi kitabları Prezident Kitabxanasına, Elmlər Akademiyasının və Milli Məclisin kitabxanalarına, habelə Gəncə və Zaqatala kitabxanalarına paylayacaqdır.
Ə.Qarayev xatırlatmışdır ki, Azərbaycan xalqının ümummilli lideri Heydər Əliyev ədəbiyyatı yüksək qiymətləndirirdi, onun rəhbərliyi dövründə kitabxanalar və kitabxana işi haqqında qanun qəbul edilmişdir. Hazırda bu siyasəti Prezident İlham Əliyev layiqincə davam etdirir.
Vladimir Ruşaylo səmimi görüşə görə təşəkkürünü bildirərək demişdir ki, MDB-nin İcraiyyə Komitəsi iqtisadi inteqrasiyanı və humanitar sahənin inkişafını ön plana çəkir. O, Humanitar Fondun vəzifələri, Humanitar əməkdaşlığa dair Şuranın əsasnaməsi haqqında qısa məlumat vermişdir. Qonaq bildirmişdir ki, Azərbaycan MDB ölkələri ilə bütün sahələrdə, o cümlədən humanitar sahədə fəal əməkdaşlıq edir.
V.Ruşaylo demişdir: "Bu gün biz Azərbaycanın kitabxanalarına millətlərarası ünsiyyət dili və dünya mədəniyyətinin xəzinəsini əhatə edən rus dilində ədəbiyyat təqdim edirik".
Azərbaycan Yazıçılar Birliyinin sədri, xalq yazıçısı Anar, Milli Məclisin İqtisadi siyasət daimi komissiyasının sədri Ziyad Səmədzadə hədiyyəyə görə təşəkkürlərini bildirmişlər.

Azərbaycan.-2007.-6 iyun.-S.5.