Dövlət Proqramına əsasən işlər davam etdirilir

"Azərbaycan" qəzetinin 13 may 2007-ci il tarixli sayında dərc edilmiş "Məktəbimizin binası yoxdur" başlıqlı məqalə Mədəniyyət və Turizm Nazirliyində araşdırılmışdır.
Gədəbəy Rayon Mədəniyyət və Turizm Şöbəsi bildirmişdir ki, rayonun Zəhmət kənd uşaq musiqi məktəbi mədəniyyət evinin binasında yerləşir. Məktəbin sərəncamına 8 sinif otağı verilmiş və burada tədris üçün hər cür şərait yaradılmışdır.
Uşaq musiqi, incəsənət və rəssamlıq məktəblərinin maddi-texniki bazasının möhkəmləndirilməsi, habelə ixtisas təhsilli pedoqoji kadrlarla təmin edilməsi məsələləri Mədəniyyət və Turizm Nazirliyinin daim diqqət mərkəzindədir. Nazirlik tərəfindən "Azərbaycan Respublikasının uşaq musiqi, incəsənət və rəssamlıq məktəblərinin təkmilləşdirilməsi və inkişafına dair Dövlət Proqramı" işlənib hazırlanmışdır. Bu proqrama əsasən 2008-2012-ci illərdə respublikanın şəhər və rayonlarında fəaliyyət göstərən uşaq musiqi, incəsənət və rəssamlıq məktəbləri binalarının təmiri, yeni binaların inşası, habelə tədris müəssisələrinin zəruri musiqi alətləri, tədris vəsaiti, inventar və avadanlıqla təchiz edilməsi nəzərdə tutulmuşdur. Məktəblərin ixtisas təhsilli pedoqoji kadrlarla təmin edilməsi sahəsində də müəyyən işlər görülmüş və görülməkdədir.
Məqalədə Gədəbəy rayonundakı 109 kitabxanadan 61-nin şəxsi evlərdə yerləşdiyi barədə məlumat verilir. Bildiririk ki, 2006-cı ilin aprel-may aylarında Mədəniyyət və Turizm Nazirliyinin tapşırığı ilə respublikanın şəhər, rayon və kənd kitabxana filiallarının pasportlaşdırılması həyata keçirilmişdir. Məlum olmuşdur ki, Gədəbəy rayonunda fəaliyyət göstərən bir sıra kitabxana filialları 1946-1993-cü illərdə şəxsi evlərdə yaradılmışdır, onların vəziyyəti qənaətbəxşdir.
Rayonun Ərtəpə, Arabaçı, Dördlər kəndlərində fəaliyyət göstərən kitabxana filiallarının bina şəraiti qeyri-qənaətbəxşdir. Lakin bu kitabxanalar şəxsi evlərdə yerləşmir.
Prezidentinin 20 aprel 2007-ci il tarixli "Azərbaycanda kitabxanaların fəaliyyətinin yaxşılaşdırılması haqqında" Sərəncamına əsasən 2008-2013-cü illərdə rayon Mərkəzi kitabxanası üçün modern binanın inşa və avadanlıqla təchiz edilməsi, Zamanlı, Göyəlli, Poladlı, D.Rəsullu, İsalı, Qarabağlı, Gər-gər Söyüdlü, Əlinağılar, Mutudərə, Ərtəpə, Arabaçı (Şınıx), Dördlər, Maarif, Slavyanka, Talakənd, Y.Saratovka kənd kitabxana filialları üçün yeni binaların inşası, 16 kənd kitabxana filiallarının əsaslı təmiri və avadanlıqla təchiz edilməsi nəzərdə tutulub.
Şəxsi evlərdə yerləşən 13 kitabxana üçün 2008-2013-cü illərdə yeni binalar inşa ediləcəkdir.

Azərbaycan.-2007.-26 iyun.-S.8.