İsayev Ə.

Goranboyda Heydər Əliyev muzeyinin açılışı olub

Xalqımızın ümummilli lideri Heydər Əliyev dəfələrlə Goranboyda olub. Hər dəfə də rayonun inkişafı üçün tükənməz qayğı və kömək göstərib. Ən əsası budur ki, ölkənin hər yerində olduğu kimi sərhəd bölgəsində yerləşən Goranboyda da sabitlik yaratdı, dinamik inkişafın etibarlı bünövrəsini qoydu.
Odur ki, goranboylular ulu öndəri ehtiramla yad edir, onun xatirəsinin əbədiləşdirilməsi və müqəddəs ideyalarının ardıcıl surətdə həyata keçirilməsi üçün əllərindən gələni əsirgəmirlər. Rayonda Heydər Əliyev prospekti yaradılıb, ulu öndərin abidəsi ucaldılıb, qəsəbə və kəndlərdə büstləri qoyulub.
Bu günlərdə rayonun mərkəzində, ən baxımlı yerdə Heydər Əliyev muzeyinin açılışı oldu. Xalq sənətkarlarının əli ilə milli ornamentlərlə bəzədilmiş bu işıqlı, yaraşıqlı binanın geniş salonunda otuz beş il ölkəyə rəhbərlik edən və Azərbaycanı dünyanın hər yerində tanıdan Heydər Əliyevin ibrətamiz həyat yolunu əks etdirən qiymətli eksponatlar toplanıb.
Təntənəli mərasimi rayon icra hakimiyyətinin başçısı Novruz Novruzov açdı. Rabitə və informasiya texnologiyaları naziri, akademik Əli Abbasov, Milli Məclisin üzvü Gültəkin Hacıyeva, YAP Goranboy rayon təşkilatının sədri Nizaməddin Quliyev, Ağsaqqallar Şurasının sədri Əli Paşayev, uşaq yaradıcılıq mərkəzinin müəllimi Xatirə Vəliyeva və başqaları çıxış edərək ölkənin yüksəlişində ulu öndərin əvəzsiz xidmətlərindən və dahi rəhbərin yolunu uğurla davam etdirən İlham Əliyevin məqsədyönlü fəaliyyətindən danışdılar.
Muzeyin qarşısında təqribən beş hektar sahədə Heydər Əliyev adına mədəniyyət və istirahət parkı yaradılıb. Tədbirin iştirakçıları burada yeni ucaldılmış obyektlərlə tanış oldular. Ağsaqqallar evi, uşaq internat məktəbi, tarix-diyarşünaslıq muzeyi, rəsm qalereyası, əyləncə idman mərkəzi, fəvvarələr və körpülər kompleksi öz milli-estetik görkəmi ilə diqqəti cəlb edir. Elə həmin parkın başında idman sarayının açılışı oldu. Yanında isə üzgüçülük hovuzu inşa edilir.
El ağsaqqalı Əli Paşayevin dediyi kimi, Heydər Əliyev Azərbaycanın hər guşəsində, ölkəmizin hər bir qədirbilən vətəndaşının qəlbində olduğu kimi goranboyluların ürəyində də özünə layiqli abidə ucaldıb.
Ulu öndərin adını daşıyan Xatirə muzeyi bu yerlərin əsl ziyarət guşəsinə, and yerinə çevrilib.

Azərbaycan.- 2007.- 21 iyun.- S. 6.