Daha bir “Pəncərə”
“Pəncərə” mədəniyyət jurnalının növbəti sayı işıq üzü görüb. Jurnalın bu sayı da baş redaktor Günel Anarqızının oxuculara xitabı ilə açılır.
“Şəbəkə” bölümündə ötən ilin dekabrından bu ilin fevralınadək keçirilən mühüm tədbirlər, mədəniyyət və incəsənət xadimlərinin xatirəsinə həsr olunmuş gecələrin qısa xülasələri yer alıb.
Toplunun “Dünya bir pəncərədir” adlı bölməsi böyük cazmen Vaqif Mustafazadənin həyat və yaradıcılığını əks etdirir. Məqalədə V.Mustafazadənin sənətə gəlişi, caza olan sevgisi və onun özünəməxsus fantaziyası barədə düşüncələr oxuculara təqdim olunub. Cazmenin yarımçıq qalan “Yuxu görürəm”, “Onsuz həyat olurmu”, “Çox da aramızda körpülər yoxdur” əsərləri ilə onun ömür yolu arasında maraqlı bir ahəngdarlıq olduğu vurğulanıb: “Melodiyalar Vaqif Mustafazadənin ürəyində axirətə qovuşsa da, bu adlar onu sevənlər üçün sanki bir ismarıc olaraq qaldı. Həqiqətən də “fantaziyanın” yoxluğu yuxu kimidir. Nə olsun ki, onunla aramızda körpülər yoxdur, əvəzində eCAZkar musiqisi daim sənətkarın varlığından xəbər verir... Onsuz həyat olurmu?”
“Pəncərədən əsdi külək” adlı bölümündəki Sara Oğuz Nəzirovanın “Küləkdən yoğrulmuş palitra” məqaləsi görkəmli rəssam Tofiq Cavadovun xatirəsinə həsr edilib. Onun yaratdığı tablolardan, ömür yolundan və faciəvi ölümündən söhbət açılıb. Müəllif T.Cavadovun yaradıcılığında daha çox küləkli mənzərələrə və təsvirlərə yer verməsinin onun xasiyyəti ilə oxşarlıq təşkil etdiyini vurğulayıb: “Rasim Babayev də deyib ki, Tofiq öz tablolarının obrazlarına oxşayır. Tofiq Cavadovun tamamlaya bilmədiyi, sonralar sənətşünasların “Külək” adlandırdıqları monumental əsəri onun kətan üzərində küləklə son dialoqu oldu”.
Xalq yazıçısı Anar “Yaralı heykəl, yaralı yaddaş” adlı məqaləsində Azərbaycanın qədim şəhəri olan, hazırda erməni işğalı altında inləyən Şuşanın yaranma tarixindən, və Xan qızı Natəvandan bəhs edib: “XIX əsr şairəsi Xurşid Banu Natəvanın adı gələndə xatirələrdə onun doğma şəhəri Şuşa canlanır. Şuşanı xatırlayanda özümüzdən asılı olmayaraq Natəvanı yada salırıq...”
“Pəncərədən səs gəlir” adlı bölümdə Nərmin Əliyevanın mahir nağara ifaçısı Natiq Şirinovla müsahibəsi yer alıb.
“Rejissor haqqında paradoks” yazısında Məryəm Əlizadə çağdaş Azərbaycan teatrının görkəmli rejissoru Vaqif İbrahimoğlunun potretini yaradıb.
Danimarkada yaşayan həmyerlimiz, pianoçu Kəmalə Hüseynovanın müsahibəsi də jurnalda öz əksini tapıb.
“Pəncərədən baxan” bölməsində “Xəzər” televiziyasında yayımlanan “Pəncərə” verilişinin aparıcısı Nərgiz Cəlilova ilə müsahibə verilib.
Topluya daxil edilən yazılar içərisində peşəkar stomatoloq, eyni zamanda istedadlı rəssam və musiqiçi olan Yaqub Kasımoğlu haqqında “Sənət və sənətkar” məqaləsi də var. Jurnalda “Azərbaycanfilm” kinostudiyasında istehsal olunan “Arxada qalmış gələcək” filmilə bağlı maraqlı fikirlər əks etdirilib.
“Mənim qırmızı almam” başlıqlı yazıda gənc və istedadlı skripkaçı Cəmilənin uğurları əks olunub.
Nəşrin sonunda yazıçı Orxan Fikrətoğlunun “Ayrıc” hekayəsi verilib.
Günel MUSAYEVA
525-ci qəzet.- 2010.- 3 aprel.- S.23.