Şair Qəşəm Nəcəfzadə ilə Sumqayıtda görüş olub

Tədbir Əli Kərim Poeziya Klubunun və Səməd Vurğun adına Mərkəzi Şəhər Kitabxanasının təşəbbüsü ilə reallaşıb. Bu barədə poeziya klubunun rəhbəri şair İbrahim İlyaslı məlumat verib. Sumqayıt poeziyasevərləri, kitabxana işçiləri və Sumqayıt Dövlət Unversitetinin Filologiya fakültəsinin tələbələri görüşdə iştirak ediblər. Görüş təşkilatçılarının əsas məqsədi müasir ədəbi prosesin hazırkı durumu barədə oxucuları tanış eləmək, həm də onların fikrini öyrənmək idi. Kitabxanada şairin ölkəmizdə və xaricdə çap olunmuş kitablarından ibarət stend təşkil olunub, internet saytından kadrlar nümayiş etdirilib. Tədbiri giriş sözü ilə şair Zirəddin Qafarlı açıb. Şair-jurnalist Rafiq Oday şairin həyat və yaradıcılığı haqqında məlumat verib. Şairlərdən Məlahət Yusifqızı, Nazilə Gültac, Fərqanə, Narıngül, Reyhan Kənan və başqaları çıxış edərək, Q.Nəcəfzadənin yaradıcılığı haqqında fikirlərini söyləyiblər. Q.Nəcəfzadə oxucuların suallarını cavablandırdıqdan sonra yeni şeirlərini oxuyub. Sonda şair oxuculara kitablarını hədiyyə edib, Şəhər Mərkəzi Kitabxanasının direktoru Yeganə Əhmədova Q.Nəcəfzadəyə və qonaqlara kollektiv adından təşəkkürünü bildirib.

525-ci qəzet.- 2010.- 14 aprel.- S.7.