Muzey Mərkəzində gəlinciklər sərgisi

Mədəniyyət və Turizm Nazirliyinin dəstəyi ilə Muzey Mərkəzində gəlincik ustaları Pərviz Hüseynov və İrina Qundorinanın əsərlərindən ibarət sərgi təşkil olunub. Sərginin açılışında çıxış edən mədəniyyət və turizm nazirinin müavini Sevda Məmmədəliyeva, Bakı şəhər mədəniyyət və turizm idarəsinin rəisi Əlikram Əliyev, xalq rəssamı Ağaəli İbrahimov və başqaları gəlinciklərin bəzəyində rənglərin düzgün seçimini yüksək qiymətləndirərək, Azərbaycan milli ornamentlərindən yerində istifadə olunması baxımından gözəl sənət əsərlərinin nümayiş etdirildiyini vurğulayıblar.

Əsərləri bir çox beynəlxalq sərgilərdə mükafat qazanmış Pərviz Hüseynov və İrina Qundorina onlara yaradılan şəraitə və sənətlərinə göstərilən diqqətə görə tədbirin təşkilatçılarına və iştirakçılarına təşəkkür ediblər. Sərgiyə müəlliflərin müxtəlif nağıl və əfsanə qəhrəmanı olan, bəzəkli geyimlərdə 25-dək gəlincik işi çıxarılıb.

Qalereyada həmçinin Tatyana Ağababayeva, Eldar Qurbanov, Namiq Məmmədov, Emin Əsgərov və digər gənclərin əsərləri də sərgilənir. Sərgi aprelin 23-dək davam edəcək.

SARA

525-ci qəzet.- 2010.-22 aprel.- S.7.