“Azərbaycan 1941-45-ci illər müharibəsində” adlı sərgi açılıb

AMEA-nın Milli Azərbaycan Tarixi Muzeyində faşizm üzərində qələbənin 65 illiyinə həsr olunmuş “Azərbaycan 1941-45-ci illər müharibəsində” sərgisi açılıb. Bu barədə AMEA-dan məlumat verilib. 200-dən çox eksponatın təqdim edildiyi sərgidə 1941-45-ci illər Böyük Vətən Müharibəsi cəbhələrində qəhrəmanlıq göstərmiş, iki dəfə Sovet İttifaqı Qəhrəmanı general Həzi Aslanov, Sovet İttifaqı Qəhrəmanı adına layiq görülmüş İsrafil Məmmədov, Mehdi Hüseynzadə kimi qəhrəman döyüşçülərin şəxsi əşyaları, hərbi geyimləri, orden və medalları, şəxsiyyət vəsiqələri, bayraqlar, arxa cəbhədə nəşr olunmuş qəzet və jurnallar nümayiş etdirilir. Tədbiri AMEA-nın vitse-prezidenti Arif Həşimov açaraq, müharibə cəbhələrində, əsir düşərgələrində faşistlərin törətdikləri qəddarlıqdan danışıb, böyük qələbənin yaddaşlarda yaşamasında belə sərgilərin əhəmiyyətini xüsusi vurğulayıb.

Muzeyin direktoru akademik Nailə Vəlixanlı, Səbail rayonu Veteranlar Şurasının sədri Ömər Ağayev, neftçi Məhərrəm Məmmədoğlu, Mərkəzi Elmi Kitabxananın direktoru Aybəniz Kəngərli və başqaları arxa cəbhədə insanların fədakar əməyindən söz açıblar. Tədbirdə AMEA Milli Azərbaycan Tarixi Muzeyinin Elmi Şurasının qərarı ilə nəşr olunmuş “Biz birlikdə qalib gəldik“ məqalələr toplusunun təqdimatı da olub. Faşizm üzərində qələbənin 65 illiyinə həsr olunmuş kitabda arxiv materialları əsasında azərbaycanlı döyüşçülərin igidlikləri haqqında oçerklər, müharibə dövrünü əks etdirən məqalələr yer alıb.

SARA

525-ci qəzet.- 2010.- 22 aprel.- S.7.