Aşıq Nəcəfin 110 illiyi Gənc Tamaşaçılar Teatrında qeyd olunub

Gənc Tamaşaçılar Teatrında tovuzlu Aşıq Nəcəfin anadan olmasının 110 illik yubileyi keçirilib. Tədbir çərçivsəində həmçinin “Düşdüm eşqin sevdasına” adlı şeirlər kitabının təqdimatı da olub. Yubiley tədbirinin aparıcısı, filologiya elmləri doktoru, professor Qəzənfər Paşayev cəmi 46 il yaşamış Aşıq Nəcəfin qısa ömür sürməsinə baxmayaraq, böyük yaradıcılıq irsi qoyduğunu bildirib.

Azərbaycan Aşıqlar Birliyinin sədri, xalq şairi Zəlimxan Yaqub Aşıq Nəcəfin şeirlərini ustadların dilindən öyrəndiyini bildirib.

Tədbirdə çıxış edən millət vəkili Qənirə Paşayeva Aşıq Nəcəfin həyat və yaradıcılığı barədə söz açıb.

Gecədə şairlər aşığın yaradıcılığından nümunələr səsləndiriblər, aşıqlar və müğənnilər onun qoşma, təcnis və gəraylılarına yazılmış mahnıları, aşıq havalarını ifa ediblər.

Qeyd edək ki, Aşıq Nəcəfin gecədə təqdim olunan “Düşdüm eşqin sevdasına” kitabında şairin ustadnamə, gəraylı, qoşma, təcnis, divani, müxəmməs, deyişmələri yer alıb. Nəşrə həmçinin sənətkara ithaf olunmuş şeirlər də daxil edilib. Aşığın ayrı-ayrı vaxtlarda iki kitabı işıq üzü görüb. Kitabın ön sözünün müəllifi millət vəkili Qənirə Paşayeva, toplayıb tərtib edəni Bağman Baba, rəyçi filologiya elmləri doktoru, professor Qəzənfər Paşayevdir.

SARA

525-ci qəzet.- 2010.- 24 aprel.- S.16.