Sumqayıtda Vaqif Mustafazadəyə həsr edilən konsert olub

Mədəniyyət və Turizm Nazirliyinin təşkilatçılığı ilə Sumqayıtda dünya şöhrətli cazmen Vaqif Mustafazadənin xatirəsinə həsr edilmiş konsert keçirilib. Sumqayıtdakı Bülbül adına incəsənət məktəbində təşkil edilmiş konsert zamanı foyedə təşkil edilmiş böyük sərgidə tanınmış virtuozun qısa ömür yolu nümayiş etdirilib. Tədbirdə bu yaxınlarda İsveçrədə keçirilmiş beynəlxalq caz festivalının qalibi, virtuoz pianoçu İfsar Sarabski çıxış edib, cazmenin fortepiano üçün yazdığı bir sıra kamera pyesləri gənc pianoçular Seymur Əliyev və Əfqan Rəsul tərəfindən ifa olunub. Konsertdə 2000-ci ildə Bakı Sirki yanında yaradılmış “Arena” caz orkestri proqram təqdim edib. Gecədə C. Martin, Simons, A. Quryanov, S. Kenton və D. Ellinqtonun əsərləri səslənib. Konsert proqramında xalq artisti Elxan Əhədzadə əfsanəvi Frenk Sinatranın repertuarından mahnılar ifa edib. Xatırladaq ki, V.Mustafazadənin xatirəsinə həsr edilmiş növbəti konsert Gəncədə olacaq.

SARA

525-ci qəzet.- 2010.- 27 aprel.- S.7.