Fikrət Sadıq haqqında “Poetik inamın özünəməxsusluğu” təqdim edilib

Yazıçılar Birliyində (AYB) filologiya elmləri doktoru, professor İfrat Əlizadənin “Poetik inamın özünəməxsusluğu” kitabının təqdimatı keçirilib.

AYB-nin mətbuat xidmətinin rəhbəri, şair Ədalət Əsgəroğlunun verdiyi məlumata görə, tədbirdə yazıçı-publisist Aqşin Babayev çıxış edərək kitabın müsbət xüsusiyyətlərindən danışıb: “Müasir poeziyanın tanınmış nümayəndələrindən olan şair Fikrət Sadığın yaradıcılığına həsr edilmiş kitab son dövr ədəbiyyatşünaslığımızın uğurudur”.

Təqdimat mərasimində AMEA-nın müxbir üzvü Tofiq Hacıyev, millət vəkili Jalə Əliyeva, yazıçı-publisist Nahid Hacızadə çıxış edərək Fikrət Sadığın müasir Azərbaycan poeziyasında özünəməxsus yaradıcılıq xüsusiyyətlərinə, orijinal poetik keyfiyyətlərə məxsus şair olduğunu vurğulayıblar. Çıxış edənlər tanınmış alim, yüzlərlə elmi məqalənin müəllifi İ. Əlizadənin onun əsərlərini tədqiqat obyektinə çevirməsini mühüm ədəbi hadisə kimi qiymətləndiriblər.

Şairlər Abbas Abdulla, Qəşəm Nəcəfzadə, Mahirə Abdulla, yazıçı-dramaturq Firuz Mustafa və başqaları yaxın vaxtlarda 80 illik yubileyi qeyd ediləcək Fikrət Sadığın şair kimi səmimiyyətindən, yüksək insani keyfiyyətlərindən danışıblar, onun poeziyasını müasir ədəbi nəslin keyfiyyət göstəricisi adlandırıblar. Kitabın elmi redaktoru Cəlal Abdullayev, rəyçilər filologiya elmləri doktoru Vaqif Sultanlı, filologiya elmləri namizədi Sürəyya Sultanovadır.

SARA

525-ci qəzet.- 2010.- 27 aprel.- S.7.