Azərbaycan musiqisinin Oqtay Kazımi itkisi

Bugünlərdə Azərbaycan incəsənətinə daha bir ağır itki üz verdi. Görkəmli bəstəkar, unudulmaz mahnılar müəllifi Oqtay Kazımi avqustun 9-da vəfat etdi. Ömrünün 50 ildən çoxunu Azərbaycan musiqisinin inkişafına həsr edən bəstəkar musiqimizin zənginləşməsinə böyük töhfələr verib.

Xalq çalğı alətləri üçün konsertləri, “Millətin oyaq gecəsi” vokal simfonik poeması, “Qarabağ rapsodiyası”, təntənəli uvertüraları, 60 qədər teatr tamaşasına bəstələdiyi musiqiləri, operettaları sənətkara böyük uğur gətirib. Ancaq bəstələdiyi çox sayda məşhur mahnı Azərbaycanda bir neçə nəslin ən sevimli musiqiləri sırasında yer alıb. Həmin nəğmələr bu gün də sevilir, gələcəkdə də öz müəllifinin adını, xatirəsini yaşadacaq.

Mərhum bəstəkarla keçirilən vida mərasimi dövlət tərəfindən ona verilən evində təşkil edilib (Lent.az). Dəfn mərasiminə gələn sənətkarlar sırasında Aybəniz Haşımova, Flora Kərimova, Firuzə İbadova, Yalçın Rzazadə, Gülyaz Məmmədova, Aslan Hüseynov, bəstəkarlardan Faiq Sücəddinov, Ramiz Mirişli, dirijor Ağaverdi Paşayev və başqaları olub.

Xalq artisti Faiq Sücəddinov Oqtay Kazımini yaxşı tanıdığını, onun çox təvazökar və sakit adam olduğunu deyib: “Bu, Azərbaycan mədəniyyəti üçün həqiqətən də böyük itkidir. Amma onu da deyim ki, nə qədər biz varıq, onun musiqiləri daim səslənəcək, daim eşidiləcək və biz onu yad edəcəyik”.

Vəziyyəti pisləşəndən son dəqiqələrinə kimi bəstəkarın yanından ayrılmayan Aybəniz Haşımova Oqtay Kazıminin vəfatından böyük sarsıntı keçirib: “Çünki mən Oqtay Kazıminin mənəvi qızıyam. 15 yaşından onun evində, onun tərbiyəsi altında böyümüşəm. Ata itkisi, ata yoxluğu böyük bir faciədir. Amma bu, ikiqat faciədir. Çünki Azərbaycan musiqisindən də çox böyük insan gedir. Mən onun çox musiqilərini ifa etmişəm. Məxsusi mənim üçün yazdığı əsərləri vardı. Artıq mən yetim və kimsəsiz qaldım bu sənətdə. Oqtay müəllim sağ idi deyə mən rahat idim. İndi tamam qırıldım. Daha oxumaq istəmirəm, sənəti tərk etmək istəyirəm. Gülarə xanımın, Şövkət xanımın ölümündən sonra məni ayağa Oqtay müəllim qaldırdı. Ancaq daha o da yoxdur. Bircə onu bilirəm ki, Oqtay Kazıminin nəğmələri dillər əzbəridir və həmişə də yaşayacaq”.

Xalq artisti Yalçın Rzazadə Oqtay Kazımilə birgə çətin, ağır və xoşbəxt günlər keçirdiyini, ilk oxuduğu mahnılarının, sənət yolunun Oqtay Kazımi ilə çox bağlı olduğunu söyləyib: “Bizim çox yaxşı münasibətlərimiz olub. Hətta Oqtay Kazımiyə, Cabir Novruza və mənə “qızıl üçlük” deyirdilər. Ona görə də bu itki mənim üçün çox ağırdır. Oqtay Kazımi böyük bəstəkar idi. Azərbaycan musiqisində danılmaz xidmətləri var. Onun kimi sənətkarlar təkrarsız olur. Bir də həyata gəlmir. Allah onun ruhunu şad eləsin!”

Mərhumun oğlu İlqar Kazımov atasının 2 aya yaxındır ki, özünü yaxşı hiss etmədiyini, son 3 gündə isə vəziyyətinin daha da ağırlaşdığını bildirib. O, dəfnə mədəniyyət və turizm nazirinin müavini Sevda İbrahimovanın və Musiqili Komediya Teatrının direktoru Əliqismət Lalayevin də gəldiyini vurğulayıb. İlqar Kazımovun sözlərinə görə, Mədəniyyət və Turizm Nazirliyindən, Bəstəkarlar İttifaqından kömək təklif olunsa da, ehtiyac görmədikləri üçün imtina ediblər.

Vidadan sonra bəstəkarın cənazəsi səssiz-səmirsiz, sakit notlar altında son mənzilə yola salınıb. Mərhum sənətkar, öz vəsiyyəti üzrə, Xırdalanda ailə qəbiristanlığında dəfn olunub.

Allah rəhmət eləsin!

525-ci qəzet.- 2010.- 12 avqust.- S. 4.