“Qobustan” sənət toplusunun yeni sayı çapdan çıxıb

Topluda unudulmaz şair Rəsul Rzadan bəhs edən “Polifonik poeziya”, “Böyük sənət simsarı” yazıları verilib. Jurnalda yer alan “Böyük bəstəkar haqqında kiçik qeydlər” başlıqlı məqalə Rəsul Rzanın dahi bəstəkar Qara Qarayev haqqında fikirlərindən ibarətdir. Şair yazıda qeyd edib ki: “Sənət yolunun 40 illik yolçusu Qara Qarayevin zəngin yaradıcılıq təcrübəsi təsdiq edir ki, onun simasında Azərbaycan dünya musiqi mədəniyyəti xəzinəsinə tarixi bir dəyər bəxş etmişdir”. Rəsul Rzanın digər səhifədə yer alan “Dostum Tahir Salahov” yazısında xalq rəssamı Tahir Salahovun şəxsiyyətindən və onun iş üslubundan söhbət açıb. Sənətşünaslıq doktoru, professor Məryəm Əlizadə A.P.Çexovun 150 illiyinə həsr etdiyi “Çexovun “Universal mənəviyyat sistemi”nə “Yuğ”un baxışı” məqaləsində Çexovun “Yuğ” teatrının səhnəsində tamaşaya qoyulan əsərlərindən və bu əsərlərə öz münasibətindən yazıb. Azərbaycan Dövlət Rəssamlıq Akademiyasının dissertantı Günay Vəliyevanın “Tahir Salahovun Xəzər epopeyası” məqaləsində xalq rəssamının dəniz mövzusunda olan əsərlərinə işıq salınıb. Müəllif bildirib ki: “Rəssamın tünd rənglərlə ifadə olunan sərt relizmində Abşeron cizgiləri, Xəzər notları aydınlığı, nikbinliyi, Vətənə sevgini, ümidi və inamı, arzunu və düşüncəni ifadə edir”. AMEA-nın İncəsənət və Memarlıq İnstitutunun dissertantı Samir Sadıqov “Azərbaycan heykəltəraşlığında Mehdi Hüseynzadə obrazı” yazısında xalq rəssamı, professor Tokay Məmmədovun 1955-ci ildə yaratdığı əfsanəvi qəhrəman Mehdi Hüseynzadə portretindən söhbət açıb. Jurnalistlər Birliyinin üzvü Mirələkbər Ağasıyevin “Həmişəyaşar” məqaləsi ölməz sənətkarımız Rəşid Behbudovun 95 illik yubileyinə həsr edilib. Məqalədə müəlifin R.Behbudovla bağlı xatirələri əks olunub. Topluya daxil edilən “Nazim Hikmətin əsərləri Naxçıvan Dövlət Musiqili Dram Teatrının səhnəsində” başlıqlı yazıda Ələkbər Qasımov teatrın səhnəsində qoyulan “Kor padşah” və “Bayramın birinci günü” tamaşaları barədə fikir bildirib. “Qobustan” jurnalında “İşıq poeziyası” başlığı altında verilən yazı şair Fikrət Sadığa həsr olunub. Səhifədə F.Sadığın şeirlərindən nümunələr də öz əksini tapıb. Professor Minəxanım Təkləlinin “Türk yadigarları” məqaləsində Xoca Əhməd Yasəvi məbədinin, “Monomax tacı”, “Fəth və Zəfər” məbədlərinin maraqlı tarixçələri qələmə alınıb. “Əzim Əzimzadənin davamçıları” yazısında əməkdar incəsənət xadimi Ziyadxan Əliyev rəssam Bayram Hacızadənin sənətinə nəzər salıb. Dosent, pedaqoji elmlər üzrə fəlsəfə doktoru Oqtay Abbasov “18 yaşlı gənc qızın sənət uğurları” məqaləsində gənc rəssam Nərminin bu yaxınlarda keçirilən sərgisindən söz açıb və bu sərgidən aldığı təəssüratlarını nəzərə çatdırıb. “Əminə Dilbazinin rəqsləri him-cim sənətilə xalq oyun-tamaşa mədəniyyətinin sintezi müstəvisində” oçerkində ADMİU-nun dissertantı Ofeliya Zeynalova xalq artistinin sənət yolundan, onun qurduğu rəqslərdən bəhs edib. Əməkdar artist Pərviz Məmmədrzayev “Aktyor sənətində söz və bədən dili” yazısında teatrda aktyorun hərəktlərindən, bütöv cümlələri əvəz edə biləcək jestlərindən və bu “bədən” dilinin yaratdığı baxımlılıqdan yazıb. Jurnalın “Dramatugiya” bölməsində yerləşdirilən “Firuz Mustafanın pyeslərində şərtilik” məqaləsində çağdaş Azərbaycan dramaturgiyası və nəsrinin tanınmış nümayəndəsi Firuz Mustafanın yaradıcılığından, müəllifin bir-birinin ardınca çap olunub səhnəyə qoyulan pyeslərindən geniş söhbət açılıb. Türkiyədən yazan Ənvər Uzun “Güney Azərbaycanda teatr” məqaləsində Güney Azərbaycandakı teatr mədəniyyətini, bu vilayətdə teatr sənətinin köklərinin çox qədim köklərə söykəndiyini bildirib. Toplunun “Dialoq” bölümündə Samir Sədaqətoğlunun lənkəranlı rəssam Adil Əsədli ilə müsahibəsi təqdim olunub. Nəşrin “Kitablar, kitablar” bölməsində “Asəf Zeynallı”, “Sənətin Məcnunu” kitabları ilə bağlı filologiya elmlər doktoru Abid Tahirli və sənətşünas Əsəd Quliyevin fikirləri yer alıb. Aydın Dadaşov “Şərq kinosundan örnəklər” yazısında “Yolların nəğməsi” və “İnək” filmlərini təhlil edib. Gülxani Şükürovanın qələmə aldığı “Azərbaycan tapmacalarında mifoloji obrazlar” məqaləsi də bu nömrədədir. Toplunun son səhifələrində tarix elmləri namizədi Məmməd Məmmədovun “Açıq səma altında muzey”, teatrşünas Elçin Cəfərovun “Azərbaycan dövlət teatrları sisiteminin təşkilatlanma problemləri” və sənətşünaslıq namizədi Abbasqulu Nəcəfzadənin “Meyxana janrı və idiofonlu çalğı alətləri” yazıları oxuculara təqdim olunub.

Günel

525-ci qəzet.- 2010.-17 avqust.- S. 4.