Niyazinin doğum günü qeyd edilib

Azərbaycan Musiqi Mədəniyyəti Dövlət Muzeyinin təşkilatçılığı ilə görkəmli Azərbaycan dirijoru və bəstəkarı Maestro Niyazinin anadan olmasının 98 illiyilə bağlı tədbirlər keçirilib. Tərtib olunan proqrama əsasən səhər saatlarında muzey işçiləri, mədəniyyət adamları Fəxri Xiyabanda Maestronun məzarını ziyarət ediblər. Daha sonra bəstəkarın mənzil muzeyində davam etdirilən tədbirdə Niyazinin musiqi yazmış olduğu “Kəndlilər”, “Fətəli xan”, “Doğma xalqımıza”, “Almaz” filmlərindən fraqmentlər göstərilib. Təntənəli rəsmi hissəni giriş sözü ilə açan muzeyin direktoru Rza Bayramov müqəddəs sənət ocağındakı tədbirdə iştirak edənləri salamlayaraq keçirilən mərasimin mahiyyətini açıqlayıb: “Maestronun doğum günü şərəfinə muzey yalnız rəsmi tədbir keçirməklə kifayətlənməyib, ilk dəfə olaraq, Niyazinin musiqi yazdığı kinofilmlərin gün ərzində muzeydə fasiləsiz nümayişini təşkil edib. Bu məqsədlə Dövlət Film Fondunun köməyi ilə bəstəkarı Niyazi olan 5 kinofilmin diskləri əldə olunub”. Tədbirdə Salman Mümtaz adına Dövlət Ədəbiyyat və İncəsənət arxivinin direktoru Maarif Teymurov, Azərbaycan Musiqi Mədəniyyəti Dövlət Muzeyinin direktoru Alla Bayramova, dirijorlar, musiqiçilər, musiqişünaslar, muzey işçiləri və başqaları iştirak ediblər. Çıxışlar və xatirələrdən sonra bədii hissədə Bakı Musiqi Akademiyasının dosenti Ülviyyə Hacıbəyova, Azərbaycan Dövlət Akademik Opera və Balet Teatrının solistləri Fəridə Məmmədova, Tural Ağasıyev və digər sənətçilərin ifasında bəstəkarın “Arzu” romansı, “Yaşa yaşa, Azərbaycan” mahnısı, piano üçün pyesləri səsləndirilib. Daha sonra iştirakçılar üçün “Maestro” sənədli filmi nümayiş olunub. Təntənəli tədbirdən sonra arzulayanlar üçün yenə də bəstəkarı Niyazi olan “Mahnı belə yaranır” filmindən fraqmentlər göstərilib, Muzeyə müxtəlif mənbələrdən yeni daxil olan materiallardan ibarət sərgi keçirilib. Sərgidə Niyazinin “Xosrov və Şirin” operasının əlyazması, müxtəlif fotoşəkillər, afişalar yer alıb.

HÜSNİYYƏ

525-ci qəzet.- 2010.- 24 avqust.- S. 4.