Meksikada Dünya Gənclər Konfransı başa çatıb

Gənclər və idman nazirinin müavini İntiqam Babayevin rəhbərliyi altında nazirlik əməkdaşları və gənclər təşkilatlarının nümayəndələrindən ibarət heyətin qatıldığı Dünya Gənclər Konfransı başa çatıb. Nazirliyin mətbuat xidmətindən verilən məlumata görə, Dünya Gənclər Konfransı Meksikanın Leon şəhərində BMT tərəfindən 12 avqust 2010-12 avqust 2011-ci il müddətində elan edilən Gənclər İli çərçivəsində keçirilib. Dünya Gənclər Konfransının keçirilməsində əsas məqsəd – hökumət və gənclərin qeyri-hökumət təşkilatları nümayəndələrinin birgə müzakirəsi ilə beynəlxalq səviyyədə müəyyən edilən Minilliyin İnkişaf Məqsədlərinə (MDG) nail olmaq üçün hazırkı mərhələdə gənclər sahəsinin aparıcı prioritetlərini müəyyən etmək olub. Dünya Gənclər Forumuna bütövlükdə təxminən 110 ölkədən 3500 nəfərə qədər insan qatılıb. Konfrans 2 hissədə təşkil edilib: İctimai (gənclər) Forumu və Hökumət Forumu.

Hökumət Forumunun rəsmi açılışında Alonso Lühambia – Meksikanın Təhsil naziri və Meksika Prezidentinin Konfransda rəsmi nümayəndəsi, Priscila Vera Hernandez – Meksika Gənclər İnstitutunun Baş direktoru, BMT-nin Əhali Fondunun İcraçı direktorunun müavini – Purnima Mane, Meksikanın Quanaxuato ştatının qubernatoru və sair rəsmilər çıxış ediblər. Hökumət Forumu gənclər siyasətinin MDG ilə ahəng olan 11 əsas mövzu üzrə keçirilib. Keçirilən plenar iclasda Gənclər və idman nazirinin müavini İ.Babayev Azərbaycanda gənclər siyasətinin həyata keçirilməsində əldə edilən əsas nəticələr haqqında danışıb. Çıxışda gənclərin ictimai həyatda artan iştirakı, işsizliyin azalması, gənclərin təhsilə cəlb edilməsi və hamı üçün təhsi sahəsində əldə edilmiş nəticələr, gənclərin beynəlxalq əməkdaşlığı və gənclər təşkilatlarının iştirakının stimullaşdırılması üçün hökumət tərəfindən dəstəklənməsi məsələləri qeyd edilib. Eyni zamanda Ermənistanın Azərbaycana təcavüzü haqqında iştirakçılara məlumat verilib.

S.QARAYEVA

525-ci qəzet.- 2010.- 31 avqust.- S. 2.