“Poeziya günü”nün təqdimatı olub

Azərbaycan Yazıçılar Birliyinin (AYB) Natəvan klubunda “Poeziya günü” almanaxının təqdimatı mərasimi gerçəkləşib. Mədəniyyət və Turizm Nazirliyinin dəstəyi, AYB-in təşkilatçılığı ilə nəşr olunmuş almanaxda müasir ədəbi mühitin sayılıb-seçilən nümayəndələrinin əsərləri dərc edilib. Kitabın baş redaktoru xalq şairi Fikrət Qoca, redaktoru və tərtibçisi şair Maarif Soltandır. Nəşrə tənqidçi-ədəbiyyatşünas Vaqif Yusifli ön söz yazıb. Mərasimdə Mədəniyyət və Turizm Nazirliyinin şöbə müdiri, şair Vaqif Bəhmənli, AYB-in katibi, xalq şairi Fikrət Qoca, tənqidçilərdən Nizaməddin Şəmsizadə, Vaqif Yusifli, şairlər Balayar Sadıq, Fərqanə Mehdiyeva, Fəxrəddin Meydanlı və digərləri bugünkü şeirimizin mənzərəsini yaradan almanaxın böyük əhəmiyyət kəsb etdiyini diqqətə çatdırıblar. Tədbirdə nəsr, tərcümə və ədəbi-tənqidə həsr olunmuş almanaxların gələcəkdə də nəşr edilməsinin vacibliyi vurğulanıb.

HÜSNİYYƏ

525-ci qəzet.- 2010.- 3 dekabr.- S.7.