Kamal Abdullanın 60 yaşına

Kamal müəllim yaradıcılığına, onun təşkilatçılıq bacarığına bir diqqət olaraq özümdən asılı olmayaraq bu yazını yazmağa başladım. Ona görə yazdım ki, ad günü ərəfəsində Almaniyada olmasına rəğmən heç olmasa, ürəyimdən keçən təbrik sözlərini mətbuat vasitəsilə çatdırım.

Bu günlərdə Kamal Abdullanın Berlində Humbolt Universitetində açılan Azərbaycan elm və mədəniyyət mərkəzində iştirakı heç təsadüfi deyil. Belə ki, məhz onun təşəbbüsü ilə 2008-ci ilin oktyabr ayında Bakı Slavyan Universitetində “Humbolt adına Alman tədris və mədəniyyət mərkəz”-inin yaradılması ideyası qısa zamanda gərçəkləşdi. İki ilə yaxın müddətdə fəaliyyət göstərən mərkəz Almaniyanın ölkəmizdəki səfiri də daxil olmaqla mütəmadi olaraq almaniyalı alimlərin və qonaqların marağına səbəb olan mərkəzə çevrildi. Filologiya fakültəsinin Roman-german ixtisası ilə təhsil alan tələbələri qısa zamanda alman dilinə, mədəniyyətinə yiyələnərək iki ölkə arasında əlaqələrin qurulması işində fəaliyyət göstərməyə başladılar.

Belə ki, 2009-cu ilin sentyabr ayında başlayan ilk simpozium “Dədə Qorqud” və “Nibelunglar nəğməsi” eposlarının oxşar çəhətlərinin öyrənilməsi, Mainz Universitetinin türkoloq alimlərinin, eləcə də, Almaniyanın digər Universitetlərinin alim və magistrlarının Azərbaycana səfəri zamanı belə bir möhtəşəm simpoziumun işində iştirak etmələri xoş bir hadisə olaraq yaddaşlarda qalacaqdır. Simpoziumun 2011-ci ilin iyun ayında beş illik layihənin davamı olaraq keçirilməsinin əsas məqsədi isə Mainz Universitetində “Osvald Volkstein” cəmiyyətinin də dəstəyi ilə görülən hazırlıq işləri ilə yanaşı Kamal Abdullanın “Dədə Qorqud” eposunun qorunub saxlanmasında və öyrənilməsində xüsusi xidməti olmuş F.v.Ditsin xatirəsinə həsr olunmuş elmi əsərlər məcmuəsinin onun 195 il əvvəlki əməyinə bir diqqət olaraq hazırlanması iddiasını gerçəkləşdirməkdir. Şübhəsiz ki, qısa bir zamanda Tübungen, Manhaim, Bonn, Berlin və başqa universitetlərlə qurulan əlaqələr, tələbə yay semestr layihələri, Kamal müəllimin universitetə gələn qonaqlara diqqət yetirməsi, ümumiyyətlə, beynəlxalq əlaqələrin qurulmasında xidmətləri danılmazdır.

Son dövr Almaniya-Azərbaycan mədəni-elmi tədris əlaqələrindəki xidmətlərini nəzərə alaraq bu il Alman-Azərbaycan cəmiyyətinin 20 illik yubileyində Bakı Slavyan Universiteti “Yaşıl Budaqlar” bürünc mükafatına layiq görülmüş və bu mükafat hörmətli rektor, professor Kamal Abdullayeva təqdim olunmuşdur.

Kamal Abdullanın universitet həyatında tələbə-müəllim, müəllim-valideyn münasibətlərinin qurulmasında, eləcə də tələbələrin elmi şuralarda iştirakı, zaman-zaman onların çıxışları ilk növbədə özlərinə inam hissi oyadır və onlar bir növ həyat dərsi keçərək formalaşırlar.

Bu yaxınlarda “525”-ci qəzetdə Kamal Abdullaya həsr olunmuş “Zamandar” adlı məqalə çap olunmuşdu. Bu məqalə onun işlərinin həcmi, düşündüyü layihələri gerçəkləşdirmək üçün zaman baxımından vaxt azlığı ilə üzləşdiyinin sübutudur. Sanki, bu dar zamanda Azərbaycanın beynəlxalq səviyyədə tanınması istiqamətində düşündüyü ideyaların hamısını həyata keçirmək arzusundadır. Beynəlxalq səviyyədə tanınan dəyərli alimimiz vaxtın darlığını hiss etmədən bundan sonra da öz yaradıcılığı ilə bizləri heyran etməyə və yaxşı mənada təəccüləndirməyə davam etməsini arzu edirik.

Çingiz ABDULLAYEV,

Alman-Azərbaycan cəmiyyətinin idarə heyətinin sədri,

kulturalogiya elmlər doktoru,

professor

525-ci qəzet.- 2010.- 4 dekabr.- S.23.