“Sazın Ədaləti, Ədalətin sazı” adlı mərasim təşkil edilib

Azərbaycan Dövlət Filarmoniyasında ustad aşıq, əməkdar incəsənət xadimi Ədalət Nəsibovun yaradıcılıq gecəsi keçirilib. “Sazın Ədaləti, Ədalətin sazı” adlı tədbir Mədəniyyət və Turizm Nazirliyinin və Aşıqlar Birliyinin birgə təşkilatçılığı ilə baş tutub. Tədbirdə çıxış edən Azərbaycan Aşıqlar Birliyinin sədri, xalq şairi Zəlimxan Yaqub deyib ki, tədbirin keçirilməsində əsas məqsəd Aşıq Ədalətin könlünü şad etmək, həm də bu sənətin ustadlarını xatırlamaqdır: “Aşıq Ədalət sazı milli müstəvidən çıxararaq, bu sənəti müxtəlif ölkələrdə təbliğ edib. “Qarabağ şikəstəsi” deyiləndə Xan Şuşinski, “Sona bülbüllər” deyiləndə Qədir Rüstəmov yada düşdüyü kimi, “saz” dedikdə Aşıq Ədalət, “Aşıq Ədalət” dedikdə saz yada düşür. Aşıq sənəti tarixində elə bir aşıq olmayıb ki, ona Ədalət qədər şeirlər həsr olunsun. Aşıq Ədalət sazı nə qədər gözəl çalırsa, şeiri də o qədər gözəl oxuyur, mən Ədaləti “sazın şahı” adlandırıram”. Çıxışından sonra Zəlimxan Yaqub ilk olaraq, Aşıq Ədaləti və onun yetirməsini səhnəyə dəvət edib. Tədbirdə “Yeddi oğul istərəm” filmində Aşıq Ədalətin ifasında “Yanıq Kərəmi”nin sədaları altında Cəlalın ölümü epizodu nümayiş olunub. Daha sonra aşıqlardan Fəzail Misginli, Nemət Qasımlı, Ədalət Dəlidağlı, Azər Xanlaroğlu, Ramin Qarayev, Avdı Musayev, İmaməli Budaqov, Cahangir Quliyev, Vüqar Mahmudoğlu, Bəhmən Göyçəli, İlham Astanbəyli, Fazil Təmiri və digərləri çıxış edərək, Aşıq Ədalət haqqında fikirlərini bölüşüb, ifalar səsləndiriblər.

HÜSNİYYƏ

525-ci q.zet.- 2010.- 9 dekabr.- S.7.