“Miras” “Zubroffka” kinofestivalında ikinci yeri tutub

Dekabrın 1-dən 5-nə qədər Polşada keçirilən Beynəlxalq “Zubroffka” kinofestivalı başa çatıb. Azərbaycanlı rejissor Fariz Əhmədovun çəkdiyi “Miras” sənədli filmi kinofestivalda ikinci yer üçün diploma və pul mükafatına layiq görülüb. 5 bölmədə gerçəkləşən festivalda “Miras” filmi “Şərqə pəncərə” bölməsində ölkəmizi təmsil edib. Ümumilikdə isə festivalın bu ilki proqramında mükafatlar uğrunda 25-dən artıq ölkənin 67 filmi mübarizə aparıb. Qeyd edək ki, “Miras” sənədli filmi Moskva şəhərində keçirilən 30-cu Beynəlxalq VGİK kinofestivalında “Kinematoqrafiya sənətinə sədaqətə görə” diplomunu ilə təltif olunub. Xatırladaq ki, 2010-cu ildə “Bir addım” film studiyasında istehsal olunan “Miras” filminin ssenari müəllifi Esmira Eyyub, quruluşçu operatoru Fərid Bağırov, montajçısı Firudin İsmayılov, səs rejissoru Elşən Aslanzadə, prodüserləri isə Rəşad Qasımov və Zakir Musayevdir.

HÜSNİYYƏ

525-ci qəzet.- 2010.- 9 dekabr.- S.7.