Fəridə Hacıyevanın “Hu, Mevlam, hu” kitabı işıq üzü görüb

Bu yaxınlarda Azərbaycan Yazıçılar Birliyinin üzvü, M.F.Axundzadə adına Milli Kitabxananın dövri mətbuat bölməsinin müdiri Fəridə Hacıyevanın “Hu, Mevlam, hu...” adlı kitabı nəşr edilib. “Adiloğlu” nəşriyyatında çap olunan kitabın redaktoru Nazlı Şahbazova, bədii redaktoru Murad Əsədovdur. Kitabın əvvəlində müəllif haqqında oxucuya məlumat verilib. Filologiya elmləri doktoru, professor Maarifə Hacıyeva “Əlvan sətirlər” başlıqlı yazısında qədim dövrlərdən günümüzə qədər ədəbiyyatımızda qadın şairələrin müstəsna rolundan bəhs edərək, bu sırada istedadlı şairə Fəridə Hacıyevanın da özünəməxsus mövqeyindən yazır: “XII əsrdən üzü bu yana Azərbaycan poeziyasını zənginləşdirən, adları ədəbiyyat tariximizdə iftixarla çəkilən neçə-neçə qadın şairələrimiz var. Fəlsəfi və tarixi anlam daşıyan tək ikicə misrası ilə poeziyamızın ədəbi salnaməsinə daxil olan münəvvər və zəkalı şairlərimiz olduğu kimi, bu gün imzası neçə-neçə kitablarda görünən münəvvərlərimiz ədəbiyyatımızın şeir deyilən şərəfli və ağır yükünü öz zərif çiyinlərində daşıyır. 1998-ci ildən Azərbaycan Yazıçılar Birliyinin üzvü olan, dövri mətbuatda, televiziya və radioda müntəzəm olaraq şeirləri ilə oxucu və dinləyicilərin görüşünə gələn Fəridə Hacıyeva “Gül açan xatirələr”, “Ümid çırağı”, “İtirilmiş yurd yeri” kimi bir neçə pyesin, rumın şairi M.Eminoskodan etdiyi tərcümələrdən ibarət “Ulduzlardan pay istərəm” kitabının müəllifi olmaqla bərabər “Araz”, “Məhsəti Gəncəvi”, “Qızıl qələm” fəxri mükafatlarına layiq görülüb”. M.Hacıyeva kitabın yaranma tarixini də oxucularla paylaşıb: “ Hu, Mevlam, hu” Fəridə xanımın oxucuları ilə yenidən görüşüdür. 2006-cı ildə Türkiyənin Konya şəhərinin Səlcuq Universitetində “Mevlana və Mevlevilik” simpoziumunda iştirak edən Fəridə xanımın XIII əsr Türk dünyasının böyük mütəsəvvifi, Tanrı aşiqi və insan dostu olan Həzrət Mövlanə Cəlaləddin Rumiyə olan mənəvi borcunu ifadə edən bir çox şeirləri onun “Hu, Mevlam, hu” kitabında toplanmışdır”. İncəsənət xadimi, xəttat Mehmet Rıhtım “Celaleddin Ruminin izi ile” yazısında Fəridə Hacıyevanın şeirlərini oxuyan zaman insanın özünü Mövlananın hüzurunda hiss etdiyini yazır. Kitabdakı şeirlər “Hu, Mevlam, hu”, “Özümlə söhbət”, “Gözəlliyin işində”, “Dördlüklər” adlı başlıqlar altında qruplaşdırılıb. Fəridə Hacıyevanın şair dünyası həzinlik, kövrəklik və incəlik üstündə köklənib. Qadın qəlbinin incəliyi bu kitabdakı şeirlərdə də öz əksini tapıb.

HÜSNİYYƏ

525-ci qəzet.- 2010.- 11 dekabr.- S.17.