Bədən Tərbiyəsi və İdman Akademiyasının 80 illik yubileyi qeyd olunub

Dünən Dövlət Bədən Tərbiyəsi və İdman Akademiyasının 80 illik yubileyi münasibətilə sözügedən ali təhsil müəssisəsində tədbir keçirilib. Tədbirə bu təhsil müəssisəsinin müəllim-professor heyəti, gənclər və idman naziri Azad Rəhimov, təhsil naziri Misir Mərdanov, millət vəkilləri, digər ali təhsil müəssisələrinin rəhbərləri qatılıblar.

Yubiley tədbirində çıxış edən gənclər və idman naziri Azad Rəhimov deyib ki, Dövlət Bədən Tərbiyəsi və İdman Akademiyası 1930-cu ildə yaradılıb və Cənubi Qafqazda ilk dəfə bədən tərbiyəsi üzrə ali təhsilli kadrlar hazırlayan müəssisə olub. O, bu ali təhsil ocağının hazırda ölkədə idmançı kadrların yetişdirilməsində böyük rolu olduğunu söyləyib, Akademiyaya gələcək fəaliyyətində uğurlar arzulayıb. Təhsil naziri Misir Mərdanov ali təhsil müəssisələrinin yubileylərinin qeyd olunmasına hazırda dövlət səviyyəsində diqqət ayrıldığını bildirib. M.Mərdanov qeyd edib ki, indiyə qədər idmançılarımızın nüfuzlu yarışlarda ortaya qoyduqları nailiyyətlər Dövlət Bədən Tərbiyəsi və İdman Akademiyasına verilən bir qiymətdir: “Ölkədə öz ənənələri və uğurları ilə şöhrət qazanaraq yarandığı vaxtdan xalqın xidmətində sədaqətlə dayanan, bədən tərbiyəsi və idman üzrə mütəxəssislər hazırlayan yeganə ali məktəb olan Dövlət Bədən Tərbiyəsi və İdman Akademiyasının 80 illik tarixi var. Əsası 1930-cu ildə qoyulan və cənubi Qafqazda bu tipli yeganə olan ali məktəb ilk dəfə 39 nəfər bədən tərbiyəsi və idman mütəxəssisi bitirib. İlk illər institutda 11 kafedra yaradılmışdır. 1969-cu ildə ümummilli lider Heydər Əliyevin ölkəyə rəhbər seçildiyi ildən institut üçün yeni binanın tikintisinə başlanıb və 1972-ci ildə onun açılışı olub. 70 il ərzində Azərbaycanda bədən tərbiyəsi və idmanın inkişafında bu ali təhsil ocağının xidmətləri böyükdür. Akademiya təkcə idmançılar hazırlamayıb, bura həm də böyük elmi-pedaqoji mərkəz olmuşdur. Ali məktəbdə idman və bədən tərbiyəsi sahəsində əsaslı tədqiqatlar aparılıb, metodiki tövsiyələr işlənib hazırlanıb. Bu gün Akademiyada 200 nəfərdən professor-müəllim heyəti çalışır. Azərbaycanın Olimpiya hərəkatında irəliləyişi 1997-ci ildən, Dövlət Neft Şirkətinin I vitse-prezidenti canab İlham Əliyevin Milli Olimpiya Komitəsinin prezidenti seçildiyi dövrdən sonra baş verib. Olimpiya oyunlarına lisenziya qazanan 31 idmançıdan 23-ü Akademiyanın tələbələri və məzunları olub. Məzunlardan Namiq Abdullayev sərbəst güləş, Zemfira Meftahəddinova stend atıcılığı üzrə Sidney Olimpiadasının çempionu olub, Vüqar Ələkbərov isə Azərbaycan boks tarixində ilk dəfə olaraq bürünc medal qazanıb. 1998-ci ildə institutun bazasında Milli Olimpiya Akademiyası yaradılıb və o, ölkədə Olimpiya ideyalarını, sağlam həyat tərzini, ədalətli oyun və davranış qaydalarını gənclər arasında, ümumiyyətlə, əhali arasında təbliğ etməyi öz üzərinə götürub”. Nazir Təhsil Nazirliyinin kollegiyası adından ali təhsil ocağına təbrik məktubu ünvanlandığını nəzərə çatdırıb.

Dövlət Bədən Tərbiyəsi və İdman Akademiyasının rektoru Ağacan Abiyev isə bildirib ki, Akademiyanın professor-müəllim heyəti bədən tərbiyəsi və idmanın aktual problemlərinə həsr olunan müxtəlif mövzularda elmi işlər üzərində çalışırlar. Onlar idmanın ayrı-ayrı növləri üzrə ölkənin yığma komandalarına müntəzəm elmi-metodiki köməklik göstərirlər. Rektor qeyd edib ki, Akademiyanın müəllimləri 3 mindən artıq dərslik, monoqrafiya, elmi-metodiki vəsait və məqalənin müəllifidirlər. Son illərdə Akademiyada bədən tərbiyəsi sahəsində gənc elmlər namizədlərinin sayı xeyli artıb. Sonra prezident İlham Əliyevin sərəncamı ilə “Tərəqqi” medalı və əməkdar müəllim fəxri adı ilə təltif olunan idman xadimlərinə müvafiq mükafatlar verilib.

Sevinc QARAYEVA

525-ci qəzet.- 2010.- 11 dekabr.- S.2.