Alim və şair ömrünün işıqlı
izləri
Azərbaycanın
tanınmış ziyalılarından
olan şair və alim-pedaqoq Əjdər Qiyaslının
(Əsgərov Əjdər
Xanlar oğlu) 75 yaşı tamam oldu. O, 1935-ci il dekabrın 13-də Qarabağın
axar-baxarlı, dilbər
guşələrindən birində
– Ağdam rayonunun Qiyaslı kəndində anadan olub. Orta
məktəbi bitirdikdən
sonra Azərbaycan Dövlət Xalq Təsərrüfatı İnstitutunda
təhsil alıb. Orada təhsilini uğurla başa çatdırıb. 1960-cı ildə
Azərbaycan Elmi-Tədqiqat
Kənd Təsərrüfatının
İqtisadiyyatı və
Təşkili İnstitutunda
elmi işçi vəzifəsində işləməyə
başlayıb. Həmin institutda
aspiranturaya daxil olub, dissertasiya müdafiə edərək
iqtisad elmləri namizədi alimlik dərəcəsi alıb.
1967-ci ilin sentyabrından
indiki Azərbaycan Dövlət İqtisad Universitetində müəllim,
baş müəllim,
dosent vəzifələrində
işləməyə başlayıb.
İndi 44 ildə yaxındır ki, orada “İqtisadi nəzəriyyə” fənnindən
dərs deyir. Əjdər Qiyaslı 50 ildən çoxdur ki, elmi-pedaqoji və ədəbi sahədə çalışır. Onun iqtisadiyyatın
aktual problemlərinə
dair 8 kitabı,
85-dən çox elmi
əsəri, 150-dən artıq
elmi-publisist məqalələri
çap olunub. “İqtisadi bilik bolluğun açarıdır”
başlığı altında
çap olunan çoxsaylı seriya məqalələri iqtisadçılarda
və cəmiyyətdə
dərin maraq doğurub. 50 çap vərəqi həcmində “İqtisadi
nəzəriyyə” və
26 çap vərəqi
həcmində “İqtisadi
təlimlər tarixi” dərsliklərinin müəlliflərindən
biridir. O, “Nizami Gəncəvinin iqtisadi görüşləri” mövzusunda
doktorluq dissertasiyası
üzərində işləyir.
M.F.Axundovun, C.Cabbarlının
və S.Vurğunun iqtisadi fikir dünyasına dair yazdığı və “İqtisadiyyat” qəzetində
çap etdirdiyi elmi məqalələri iqtisadi irsimizi tədqiq etmək baxımından çox dəyərlidir.
Əjdər
Qiyaslının yaradıcılığı
qoşa qanadlıdır.
O, yalnız kamil iqtisadçı, alim-pedaqoq
deyil, həm də istedadlı şair kimi tanınır. Hələ 1954-cü ildə, orta məktəbdə oxuyanda “Vətənimdir” adlı ilk şeiri
mətbuatda işıq
üzü görüb.
İndiyədək “Doğma
torpaq”, “İnsanlara inanmıram”, “Günəşli
nəğmələr”, “Yaxşı
adam görəndə”,
“Ömür karvanı”,
“Ömrün qoşa qanadı”, “Mənim dünyam”, “Yaşanan günlər” “Səmalardan gələn
səda”, “Yaradan yaşayır, yaranan qalır”, “Dünyanı yaşadan Günəş”
və “İqtisad elminin kəhkəşanında”
adlı 12 şeirlər
kitabı nəşr edilib, qəzet və jurnallarda 350-dən çox şeiri çap olunub. Şairin şeirlərinə
S.Ələsgərov, R.Mirişli,
M.Əhmədova, C.Quliyev kimi görkəmli
bəstəkarlar mahnı
bəstələyiblər. Onun şeirləri Türkiyədə, Təbrizdə,
Moskvada, Daşkənddə
çap olunub.
Əjdər Qiyaslı ilk dəfə olaraq “Dünyanın himni”ni yazıb, onu 3 dildə – Azərbaycan, rus və ingilis dillərində çap etdirib, himnin sözlərinə tanınmış bəstəkar C.Quliyev mahnı bəstələyib. Bədii yaradıcılığına görə “Araz” Ali Ədəbi mükafatı və “Qızıl Qələm” mükafatı laureatıdır. Azərbaycan Yazıçılar Birliyinin fəal üzvüdür. Şərəfli ömür yolu keçmiş Əjdər Qiyaslı bu gün də gənclik eşqilə yazıb-yaradır. Dəyərli alim və şairimizi 75 illik yubileyi münasibətilə təbrik edir, cansağlığı, yeni nailiyyətlər arzulayırıq.
GÜNEL
525-ci
qəzet.- 2010.- 14 dekabr.- S.7.