Nəbi Xəzri yad edilib

Səməd Vurğunun ev-muzeyində mərhum xalq şairi Nəbi Xəzrinin xatirəsinə həsr olunmuş tədbir keçirilib. Xalq şairləri Nəriman Həsənzadə, Söhrab Tahir, yazıçı-publisist Nahid Hacızadə Nəbi Xəzrinin 60 illik ədəbi fəaliyyəti və unudulmaz şəxsiyyəti barədə fikirlərini bölüşüblər: “Nəbi Xəzrinin yaradıcılığı XX əsr Azərbaycan poeziyasının parlaq səhifələrindən birini təşkil edir. Bu ölməz şair dilimizin poetik imkanlarından ustalıqla bəhrələnərək gözəl poeziya nümunələri yaradıb. Bununla da ədəbi dilimizin inkişafında əhəmiyyətli rol oynayıb. Nəbi Xəzri irsi gənclərin yaradıcılığına hər zaman örnəkdir və gələcək nəsillərə bu irsin çatdırılması olduqca vacibdir”. Tədqiqatçı-publisist, vurğunşünas Şəmistan Nəzirli, şairə Nurəngiz Gün bəstəkarların N.Xəzri şeirlərinə tez-tez müraciət edib gözəl mahnılar bəstələdiklərini və bu əsərlərin görkəmli sənət ustaları – xalq artistləri Şövkət Ələkbərovanın, Rəşid Behbudovun və başqalarının repertuarında mühüm yer tutduğunu dilə gətiriblər. Onlar şairin irsinin bu baxımdan da xüsusi önəm daşıdığını vurğulayıblar. Tədbirdə ədəbiyyatşünas alim Fəridə Səfiyevanın “Nəbi Xəzrinin sənətkarlığı” kitabının təqdimat mərasimi də gerçəkləşib. Mərasimdə əməkdar artist Ruhəngiz Allahverdiyeva, müğənnilər Rəşad İlyasov, Mehri Arifqızı şairin sözlərinə bəstələnmiş mahnılar səsləndiriblər. Bülbül adına Orta İxtisas Musiqi Məktəbinin tələbəsi Vurğun Vəkilov fortepianoda Şopenin “Vals”ını və özünün bəstələdiyi “Elegiya”nı ifa edib, muzeyin əməkdaşı Mələk Musayeva Səməd Vurğunun “Söz” şeirini söyləyib, Nəbi Xəzrinin Səməd Vurğun haqqında vaxtilə qələmə aldığı xatirələri tədbir iştirakçılarının diqqətinə çatdırılıb. Tədbirin sonunda şairin övladları – Gülümsər Babayeva və Arzu Babayev atalarının xatirəsinə göstərilən ehtirama görə tədbirin təşkilatçılarına və iştirakçılarına minnətdarlıqlarını bildiriblər.

HÜSNİYYƏ

525-ci qəzet.- 2010.- 14 dekabr.- S.7.