IV Beynəlxalq Mstislav Rostropoviç festivalı başlayıb

Azərbaycan Dövlət Filarmoniyasında IV Beynəlxalq Mstislav Rostropoviç Festivalının təntənəli açılış mərasimi gerçəkləşib. Tədbir Azərbaycan Dövlət Uşaq-Gənclər Simfonik orkestrinin ifasında dahi Azərbaycan bəstəkarı Üzeyir Hacıbəylinin “Koroğlu” operasının uvertürası ilə açılıb. Daha sonra mədəniyyət və turizm naziri Əbülfəs Qarayev və festivalın bədii rəhbəri, Rostropoviç Fondunun prezidenti Olqa Rostropoviç mərasimi açıq elan ediblər. Əbülfəs Qarayev festivalın keçirilməsinin mühüm məqsədlərlə bağlı olduğunu deyib: “Heydər Əliyev Fondunun, Azərbaycan Mədəniyyət və Turizm Nazirliyinin və Rostropoviç Fondunun birgə təşkil etdiyi festivalın əsas məqsədi Mstislav Rostropoviçin vətənində dünyanın tanınmış incəsənət ustalarının çıxışlarını həyata keçirməkdir. Festivalın Azərbaycan xalqının ümummilli lideri, Mstislav Rostropoviçin əziz dostu Heydər Əliyevin xatirə günündə açılması heç də təsadüfi deyil. Bununla biz bu iki dahi şəxsiyyətin xatirəsini birlikdə yad etmək qərarına gəldik. Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın təşəbbüsü ilə bu Beynəlxalq festival hər il dekabr ayında ölkəmizin paytaxtında əsl musiqi bayramı ovqatı yaradır”. Festivaldan danışan nazir burada təmsil olunacaq ölkələr haqqında məlumat verib: “Yeddi gün davam edəcək festivalda Rusiya, İsrail, Böyük Britaniya, Almaniyadan dünya şöhrətli musiqiçilər və kollektivlər – Yuri Başmet və “Moskva solistləri” kamera ansamblı, Zubin Meta və İsrail Filarmonik Orkestri, Qalina Vişnevskayanın opera mərkəzi, Maksim Vengerov, Eliso Virsaladze, Natalya Qutman, Pinkas Sukerman, Rudolf Buxbinder və başqaları iştirak edəcəklər. Əminəm ki, konsertlərdə bir çox beynəlxalq kollektivlərlə yanaşı, Üzeyir Hacıbəyli adına Azərbaycan Dövlət Simfonik Orkestrinin, Uşaq-Gənclər Simfonik Orkestrinin, Q.Qarayev adına Azərbaycan Dövlət Kamera Orkestrinin çıxışları da maraqla qarşılanacaq”. Rostropoviç Fondunun prezidenti Olqa Rostropoviç budəfəki festivalın əvvəlkilərdən fərqləndiyini dilə gətirib: “Əvvəlki festivallardan fərqli olaraq, bu il beynəlxalq layihə daha genişmiqyaslıdır və əvvəlki festivalların zirvəsi sayıla bilər. Çünki bu festivalda dünyanın ən məşhur musiqiçiləri iştirak edəcəklər”. Bakını doğma şəhəri hesab etdiyini bildirən Olqa Rostropoviç onun sənətinə göstərilən qayğı və ehtirama görə Azərbaycan xalqına, ölkə rəhbərliyinə minnətdarlığını bildirərək, ecazkar musiqi dinləmək istəyən bütün bakılıları və qonaqları festival çərçivəsində keçiriləcək tədbirlərə dəvət edib. Filarmoniyanın foyesində M.Rostropoviçin Heydər Əliyevlə görüşlərini əks etdirən fotosərgi nümayiş olunub. Xatırladaq ki, festival dekabrın 19-dək davam edəcək.

HÜSNİYYƏ

525-ci qəzet.- 2010.- 14 dekabr.- S.7.